Կառավարության աշխատակազմի նախկին ղեկավար, ներկայումս ՔՊ խմբակցության պատգամավոր Էդուարդ Աղաջանյանը ֆեյսբուքի իր էջում գրել է. «Ընդդիմության հետ, թե առանց՝ մենք իրացնելու ենք քաղաքացու կողմից ստացված մանդատը՝ ի բարօրություն մեր ժողովրդի և Հայաստանի Հանրապետության»։
«ՉԻ». Հաշվի առնելով վերջին չորս օրերի զարգացումները՝ միանշանակ իրացնելու եք: Իրացնելը ո՞րն է՝ գերակատարելու եք պլանը:
Պարզապես մնում է հասկանալ, թե ինչ եք հասկանում բարօրություն ասելով:
Օրինակ՝ կարելի է ենթադրել, որ բարօրություն ասելով՝ նկատի ունեք հասարակությանը ծիծաղ պարգևելու ցանկությունը և դրա տևողությունը: Այս առումով իսկապես կգերակատարեք պլանը: Չորս օրվա ընթացքում, ընդդիմության հետ համատեղ այնքան եք զվարճացրել հասարակությանը, որ ոչ մի նախորդ գումարման խորհրդարան չէր կարողացել ապահովել անհամեմատ ավելի երկար ժամանակահատվածում:
Օրինակ՝ այսօր կարող էիք ևս մի քանի անգամ տապալել քվեարկությունը՝ սխալ տպելով Իշխանի անունը կամ նրան առաջադրած դաշինքի անվանումը: Ֆորմալ առումով մեղավոր չէիք լինի քվեարկության տապալման համար, բայց ահագին էմոցիաներ կպարգևեիք ձեզ հետևող հեռուստադիտողներին:
Իմիջիայլոց, բարօրության մասին: Չե՞ք պատրաստվում հրաժարվել պատգամավորին հատկացված օգոստոս ամսվա ձեռքի ծախսի փողից: Ամբողջ օրը նիստերի դահլիճում եք, շրջաններ չեք այցելել, գուցե փողը պետք եկած չլինի: