Այսօր խորհրդարանում հարց ու պատասխանի ընթացքում Նիկոլ Փաշինյանը՝ անդրադառնալով պատերազմի արդյունքում կորցրած տարածքներին, ասել է. «Ասում են՝ Շուշին ծախել եմ: Եթե Շուշին ծախել են, ապա ծախել են վերջին 30 տարվա ընթացքում, որովհետև Շուշին մի հատ դժբախտ, դժգույն քաղաք էր, մեզ պետք է՞ր Շուշին: Բա որ պետք էր, ինչի՞ էր այդ վիճակում»:
«ՉԻ». Մի անգամ Սերժ Սարգսյանն ասաց, թե Աղդամը մեր հայրենիքը չէ, մեղադրեցին դավաճանության մեջ: Կրակն էր ընկել այդ արտահայտության ձեռքը:
Իսկ հիմա պարզվում է, որ Շուշիի կորուստը այնքան էլ ցավոտ չէ, քանի որ դժգույն, դժբախտ քաղաք էր, որը վերջին 30 տարում ծախում էին:
Չէ, խոսքը Ֆիզուլիի մասին չի եղել, այլ հենց Շուշիի: Չգիտենք, գուցե Նիկոլ Փաշինյանը ուրիշ քաղաք է տեսել, բայց մեզանից շատերը եղել են Շուշիում, ու տեսել ենք գեղեցիկ, կոկիկ, վերականգնված, մաքուր ու զբոսաշրջիկներով լի քաղաք՝ իր ենթակառուցվածքներով, հյուրանոցներով, խանութներով ու թանգարաններով: Որտե՞ղ է Փաշինյանը դժբախտ քաղաք տեսել:
Այս տեմպերով գնա, կպարզվի, որ Հադրութն էլ դժբախտ շրջկենտրոն է եղել:
Լավ, լավ, սուս ենք մնում, սուս ենք մնում:
Հ.Գ. Այս ելույթից հետո Նիկոլ Փաշինյանը սոցցանցի իր էջում գրել է. «Ինձ համար ակնհայտ է, որ 1994 թվականից ի վեր, մենք ցավոք, Շուշիի համար չենք հասցրել անել այն ամենը, ինչ կարող էինք անել:
Եղել են նվիրյալ գործարարներ, ովքեր շատ էական և կարևոր ներդրումներ են արել: Եղել են նաև պետական ներդրումներ, բայց մեծ հաշվով Շուշին չկարողացանք դարձնել այնպիսին, ինչին ինքը արժանի էր: Օբյեկտիվ և սուբյեկտիվ հանգամանքների բերումով: Հենց սա նկատի ունեի՝ ԱԺ ամբիոնից այդ թեմայի մասին խոսելիս»:
Շարունակում ենք սուս մնալ:
ՀԳ-2. Արտգործնախարարության մամլո խոսնակ Աննա Նաղդալյանն էլ՝ պատասխանելով Նիկոլ Փաշինյանի մտքերին, գրել է. «Խաղաղ գործընթացի որևէ փուլում չի եղել Շուշի քաղաքից հրաժարվելու հարց»: Որից հետո Զոհրաբ Մնացականյանը հրաժարականի դիմում է ներկայացրել: Չկարողացավ սուս մնալ: