Գիտե՞ք, որ քունջութե մածուկ թահինը օգտագործում են ոչ միայն աղի ուտեստների կամ հումուսի, այլև քաղցրավենիքների մեջ: Իրականում թահինը չեզոք համ ունի. իզուր չէ, որ նրանից հալվա են պատրաստում կամ նրանով պատում են համբուրգերների հացը:
Այս թխվածքաբլիթն էլ շատ համեղ է ստացվում և մի փոքր հիշեցնում է քունջութե հալվան:
Բաղադրիչները
8-10 բաժնի համար
- 2 բաժակ ալյուր
- 2/3 բաժակ թահին (քունջութե մածուկ)
- 100 գ կարագ
- 100 գ շաքարավազ
- 1 ճ.գ. վանիլային շաքարավազ
- 1 թ.գ. փխրեցուցիչ
- մի պտղունց աղ
- մաքրած, չբոված նուշ՝ զարդարելու համար
Պատրաստման եղանակը
- Կարագը փափկեցրեք, բայց մի հալեցրեք: Մեծ թասի մեջ կարագը հարեք սովորական ու վանիլային շաքարավազի հետ, ապա ավելացրեք թահինը և փայտե գդալով խառնեք: Լավ խառնեք. սովորաբար թահինը խիտ է, իսկ դուք պիտի միատարր զանգված ստանաք:
- Կարագի և թահինի զանգվածի մեջ ավելացրեք ալյուրը, փխրեցուցիչն ու աղը, խմոր հունցեք:
- Խմորից գունդ արեք, կերակրի թաղանթի մեջ փաթաթեք և 1 ժամով տեղադրեք սառնարանում:
- Խմորը մոտավորապես ընկույզի մեծության մասերի բաժանեք ու դրանցից գնդիկներ արեք:
- Գնդիկները իրարից որոշակի հեռավորության վրա տեղադրեք փայլաթիթեղով պատած տապակի մեջ:
- Յուրաքանչյուր գնդիկը մի փոքր սեղմեք ու կենտրոնում սեղմեք-տեղադրեք նուշը:
- 12-15 րոպե թխեք 180-190 աստիճան ցելսիուս տաքության ջեռոցում: Մատուցելուց առաջ լրիվ հովացրեք:
Խորհուրդ: Թխվածքաբլիթը նուշի փոխարեն կարող եք զարդարել պնդուկով:
«Չորրորդ իշխանություն», թիվ 16, 2021