«Որքան էլ տարօրինակ թվա, մեր սխալների հիմնական պատճառը մեր սիրված լինելն է եղել։ Մենք այնքան սիրված ենք եղել, որ որպես իշխանություն ձգտել ենք ավելացնել այդ սերը և մեր սերը ժողովրդի ու հայրենիքի նկատմամբ»,- երեկ հանրահավաքի ժամանակ հայտարարել է Նիկոլ Փաշինյանը:
«ՉԻ». Չէ, վարպե՛տ, առաջվանը չես, կորցրել ես շնորհդ: Պետք է խոստովանել, որ նախկինում մոտդ ստացվում էր, համենայնդեպս ազգաբնակչության մի մեծ հատված հաճույքով էր ընդունում ականջներից կախվող լապշան, իսկ հիմա՝ ոչ:
Նիկոլ ջան, արի ընդունիր, որ քո ու ժողովրդի միջև այս սիրավեպը երկուսիդ համար էլ կործանարար է և որքան երկարում է միմյանց հետ լինելը, այնքան ավելի աղետաբեր են լինելու հետևանքները:
Փաստորեն սերն է խանգարել դատաիրավական բարեփոխումներ անցկացնելուն: Իսկ մենք միամտորեն կարծում էինք, որ պատճառը քաղաքական կարճատեսությունն էր և դատավորների հետ լեզու գտնելու սխալ ընտրված ուղին:
Փաստորեն սերն է մեղավոր եղել, որ չես ցանկացել անկեղծ լինել սիրուդ օբյեկտի՝ ժողովրդի հետ և ներկայացնել, թե ինչ վտանգներ են սպառնում նրան: Սերդ է ստիպել տանել նրան մեծ ողբերգության:
Իսկ ընդհանրապես, գնալով նմանվում ես այն տղամարդուն, որը չի աշխատում, ամբողջ օրը պառկած է բազմոցին, բայց անընդհատ սեր է խոստովանում կնոջը: Սկզբում հաճելի է, հետո՝ հոգնեցուցիչ: