Սերժ Սարգսյանը օգոստոսի 19-ին մամլո-ասուլիս կտա Ռուբեն Հայրապետյանին պատկանող «Հարսնաքար» ռեստորանում: Իսկապես շատ խորհրդանշանական վայր են ընտրել Սերժ Սարգսյանի արարողակարգի պատասխանատուները: Մի վայր, որտեղ կատարվել է Սերժ Սարգսյանի պաշտոնավարման ընթացքում ամենամեծ հանցագործություններից մեկը:
Առաջարկում ենք՝ հաջորդիվ Սարգսյանը ընտրողների հետ հանդիպում կազմակերպի Մյասնիկյանի արձանի մոտ:
Գործարարների հետ քննարկում կազմակերպի «Բջնի» գործարանում:
Մարդու իրավունքների վերաբերյալ դասախոսություն կարդա «Պապլավոկ» սրճարանում:
Արմնյուզի եթերից պատմի խոսքի ազատության և գրաքննության անթույլատրելիության մասին:
Ռուսաստանի դեսպանատան դիմաց կազմակերպի իր գրքի շնորհանդեսը, որը վերնագրված կլինի՝ «Ինչու չպետք է վաճառել ռազմավարական օբյեկտները»:
Ամուլսարի տարածքում կարող է հացադուլ հայտարարել և պահանջել, որ հանքերը չաշխատեն:
Նորավանքի տարածքում կարող է բանավեճի ակումբ բացել և վիճարկել՝ «Մի ստիր» պատվիրանի արդիականությունը:
Եվ վերջապես, Ալիևից թույլտվություն խնդրի և 800 հեկտար ռազմավարական և մարտավարական նշանակություն չունեցող հողերում հանրապետականների համար ամառային ճամբար կառուցի: