Այսօր կրկին կալանավորել են ՍԴ նախագահ Հրայր Թովմասյանի սանիկ, ՀՀ արդարադատության նախարարության օրինականության վերահսկողության տեսչության նախկին պետ Նորայր Փանոսյանին: Ըստ ՔԿ-ի տարածած հաղորդագրության՝ տվյալներ են ձեռք բերվել Հրայր Թովմասյանի՝ ՀՀ արդարադատության նախարար եղած ժամանակահատվածում, Նորայր Փանոսյանի՝ ՀՀ արդարադատության նախարարության օրինականության վերահսկողության տեսչության պետ եղած ժամանակահատվածում և Երևանի քաղաքապետարանի այլ պաշտոնատար անձանց կողմից իրենց պաշտոնեական լիազորությունները չարաշահելու դեպքերի վերաբերյալ:
«ՉԻ». Ուրախների և հնարամիտների ակումբում (КВН) Բժշկական համալսարանի թիմը 1990-ականների կեսերին մի հումոր էր արել, ընդ որում՝ Ռուբեն Ջաղինյանը: ԽՍՀՄ-ի քարտեզը վերցրեց, պատռեց, հետո միացրեց, նորից պատռեց, հետո՝ նորից միացրեց: Այդպես մի քանի անգամ անելուց հետո ասաց. «Что мы делаем? Правильно – балуемся»:
Հիմա մեր իրավապահ ու դատական համակարգն է՝ իշխանություններով հանդերձ: Բռնում, բաց են թողնում, բռնում, բաց են թողնում, զբաղվում են, էլի: Իսկ դատական և սահմանադրական իշխանությունը ոնց նեխած էին, այդպես էլ՝ մնացել են: Թեկուզ Հրայր Թովմասյանի տասը սանիկի բռնեք, թեկուզ նրա մանկապարտեզյան չարաճճիություններն էլ կցեք քրեական գործերին, դրանից սահմանադրական ճգնաժամը չի լուծվելու:
Իսկ Հրայր Թովմասյանը սանիկներ, բաջանաղներ, տարատեսակ քենիներ շատ ունի: Այնպես որ, ճգնաժամը դեռ երկար է մնալու: