Թուրքիայի նախագահ Ռեջեփ Էրդողանը Վլադիմիր Պուտինին առաջարկել է Լեռնային Ղարաբաղում իրավիճակի կարգավորման համար աշխատանքային խումբ ստեղծել: Այդ մասին Էրդողանը խոսել է Ռուսաստանի նախագահի հետ նոյեմբերի 7-ի հեռախոսազրույցի ընթացքում:
Թուրքական լրատվամիջոցների փոխանցմամբ՝ այդ ձևաչափով աշխատանքները «կարող են սկսվել արդեն առաջիկա օրերին, ինչի արդյունքում կարող է ձևավորվել ԵԱՀԿ Մինսկի խմբից դուրս բանակցությունների այլընտրանքային հարթակ»:
«ՉԻ». Թեպետ ո՛չ Անկարան, ո՛չ Մոսկվան այս պահին պաշտոնապես չեն հաստատում այս տեղեկատվությունը, սակայն կրակն առանց ծուխ չի լինում:
Ակնհայտ է, որ պատերազմի առաջին իսկ օրից Թուրքիան ջանքեր է գործադրում ավելի մեծ մասնակցություն ունենալ հակամարտության կարգավորման մեջ, քան՝ պարզապես ԵԱՀԿ Մինսկի խմբի անդամ-երկիր:
Սակայն բացի նրանից, որ Հայաստանը դեմ է լինելու Թուրքիայի նման նկրտումներին, Էրդողանի ցանկությունները չեն արժանանում նաև ԵԱՀԿ Մինսկի համանախագահ երկրների՝ Ռուսաստանի, ԱՄՆ-ի և Ֆրանսիայի հավանությանը, ինչի մասին այս երկրները դիվանագիտական խողովակներով մի քանի անգամ նշել են:
Բայց մյուս կողմից էլ, բացառված չէ, որ արցախյան պատերազմը դադարեցնելու համար Ռուսաստանը անմիջական երկխոսություն սկսի Թուրքիայի հետ: Բացառված չէ, որ նրանք գան այնպիսի համաձայնության, ինչպիսին Սիրիայում ընթացող քաղաքացիական պատերազմի կարգավորման դեպքում էր:
Բոլոր դեպքերում, Հայաստանը պետք է ամեն ինչ անի, որպեսզի Թուրքիան զերծ մնա արցախյան հակամարտության կարգավորման գործընթացում անմիջական մասնակցություն ունենալուց: Բայց դրա համար անհրաժեշտ է ռազմաճակատում հասնել այնպիսի հաջողությունների, որոնք թուրք-ադրբեջանական տանդեմին կստիպեն իրենց ախորժակը փակել: