Արցախի նախագահ Արայիկ Հարությունյանի համար պատերազմի հետևանքները պարզ են եղել արդեն հոկտեմբերի սկզբին, բայց հայաստանյան քաղաքական ուժերն ընդհանուր հայտարարի չեն եկել: Այս մասին նա ասել է ԱՀ քաղաքաշինության նախարարության աշխատանքային կոլեկտիվի և շինարարական կազմակերպությունների ղեկավարների հետ հանդիպման ժամանակ:
«Չի ձևավորվում քաղաքական կոնսենսուս կամ միասնական կարծիք ընդդիմադիր, իշխանամետ ուժերի, իշխանության միջև, և կարծես թե պատերազմը կանգնեցնելն այդ օրերին համարում էին դավաճանություն»,- ընդգծել է ԱՀ նախագահը:
«ՉԻ». Բա եթե հոկտեմբերի սկզբին պարզ էր, ինչո՞ւ խորհրդականիդ չէիր ասում՝ մի փոքր ավելի զուսպ ֆեյսբուքյան գործունեություն ծավալեր: Սուրճի նկարներով ու Գանձակի օդանավակայանի մասին հեքիաթներով հանրությանը չապակողմնորոշեր ու էյֆորիկ տրամադրություններ չստեղծեր:
Քաղաքական ուժերի մասին աբստրակտ գնահատականներ հնչեցնելու փոխարեն, ավելի լավ է հասցեական նշել դրանց անունները: Ասել, թե որ քաղաքական ուժը երբ և ինչ է ասել: Հայաստանյան քաղաքական ուժերից առաջ էլ պետք է հստակեցվի, թե ինչ դիրքորոշում են ունեցել արցախյան քաղաքական ուժերը, հատկապես՝ ԱԺ-ում ներկայացվածները:
Պատերազմից անցել է վեց ամիս, դեռևս պարզ չէ, թե երբ է Արայիկ Հարությունյանը հորդորել Նիկոլ Փաշինյանին կանգնեցնել պատերազմը: Արցախի նախագահը պարտավոր է բացել փակագծերը: Դա չափազանց կարևոր կլինի առաջիկա ընտրությունների համատեքստում: Չբացելու դեպքում, լղոզված գնահատականներ հնչեցնելու պարագայում Արայիկ Հարությունյանը պակաս պատասխանատվություն չի կրում: