Երրորդ օրն է, ինչ լարված է իրավիճակը ոչ միայն Սյունիքում, այլ նաև արևելյան սահմանի ամբողջ երկայնքով: Այս ընթացքում սահմանադրության երաշխավոր նախագահի կայքում հայտնվել է ընդամենը մեկ հաղորդագրություն: Նրանում մասնավորապես ասվում է. «Նախագահը և նախագահի աշխատակազմը մշտական կապի մեջ են պետական համապատասխան մարմինների հետ: Տեղեկատվություն է ստացվում նաև անմիջապես Սյունիքի մարզից»:
«ՉԻ». Դե լավ է, մենք էլ անհանգիստ էինք, մտածում էինք՝ կարող է նախագահը տեղյակ չէ:
Հայաստանի նկատմամբ զինված հարձակում է տեղի ունեցել: Ի՞նչ պետք է աներ նորմալ երկրի ղեկավարը: Իհարկե, դադարեցներ արձակուրդը և վերադառնար հայրենիք: Բայց Արմեն Սարգսյանը թերևս 3.5 կիլոմետրը այնպիսի հիմնավոր պատճառ չի համարում, որ դադարեցնի վաղուց տենչած արձակուրդը:
Նորմալ երկրի ղեկավարը կվերադառնար հայրենիք, կմասնակցեր անվտանգության խորհրդի նիստերին՝ հասկանալու, թե ինչ են պատրաստվում անել կառավարության ժամանակավոր պատասխանատուները: Ժամանակ առաջ նրանց հրաժարականն եք պահանջել, այսինքն՝ գտել եք, որ ձախողել են, բա չգա՞ք, ձեր աչքերով տեսնեք՝ հիմա ինչ են անելու:
3 տարի է՝ մեզ կերակրում են, թե Արմեն Սարգսյանը միջազգային չտեսնված կապերի է տիրապետում: Գուցե ժամանակն է օգտագործե՞լ այդ կապերը: Կամ էլ խոստովանել, որ դրանք պետական խնդիրներ լուծելու մակարդակի չեն: