Երեկ Եվրախորհրդարանն ընդունեց արտաքին քաղաքականության և ԵՄ անվտանգության և պաշտպանության քաղաքականության վերաբերյալ 2 զեկույց, որոնցից յուրաքանչյուրում ԵՄ-ին կոչ է արել.
- Անհապաղ պատժամիջոցներ կիրառել Ադրբեջանի դեմ և կասեցնել ռազմավարական էներգետիկ գործընկերության մասին փոխըմբռնման հուշագիրը:
- Պատրաստ լինել թիրախավորված և անհատական պատժամիջոցներ սահմանելու Ադրբեջանի քաղաքական և ռազմական ղեկավարության դեմ, կասեցնել նավթի և գազի ներմուծումը Ադրբեջանի կողմից Հայաստանի դեմ ցանկացած ռազմական ագրեսիայի դեպքում:
- Ամրապնդել Հայաստանում ԵՄ առաքելության մանդատը, ավելացնել դրա չափը, երկարացնել դրա ժամկետը և դիտորդներ տեղակայել Թուրքիայի հետ սահմանին։
- Կասեցնել Ադրբեջանի հետ նոր գործընկերության համաձայնագրի շուրջ բանակցությունները։
«ՉԻ». Սա մեզ հիշեցրեց հայտնի անեկդոտը, երբ Ստալինը կանչում է Բերիային և ասում.
«Գրանցեք իմ երկու հրամանները.
1. Գնդակահարել Պոլիտբյուրոյի բոլոր անդամներին,
2. Լենինի դամբարանը ներկել կանաչ գույնով»:
Բերիան հարցնում է. «Ընկեր Ստալին, բայց ինչի՞ կանաչ»:
Ստալինը քմծիծաղ է տալիս. «Ես գիտեի, որ առաջին հրամանի վերաբերյալ առարկություններ չեն լինի»:
Հիմա կարդում ենք ԵԽ-ի չորս կետերը, ու միանգամից հարց է առաջանում. իսկ ի՞նչ կապ ունի Թուրքիայի հետ սահմանը:
Ադրբեջանի հանդեպ պատժամիջոցներ կիրառելու առաջարկները նորմալ են, հասկանալի են, կարելի է ողջունել, բայց տպավորություն է, որ այդ առաջարկները շղարշ են և միայն նրա համար են, որ դրանց արանքում կորչի Թուրքիայի հետ սահմանին դիտորդներ տեղակայելու մասին գլխավոր առաջարկը:
Կամ այլ կերպ ձևակերպենք. առաջարկվում է ՆԱՏՕ-ի անդամ երկրի հետ սահմանին եվրոպացի դիտորդներ տեղակայել: Ադրբեջանին պատժամիջոցների ենթարկելու կոչերի հետ սա ընդհանրապես չի բռնում:
Ավելի քան հարյուր տարի հայ-թուրքական սահմանը վերահսկվել է բացառապես խորհրդային-ռուսական և թուրքական սահմանապահ ուժերի կողմից, եթե չհաշվենք ամերիկյան տարատեսակ հետախուզական կայանները: Ոնց որ թե այնտեղ խնդիր չկա՝ ի տարբերություն հայ-ադրբեջանական սահմանի: Ի՞նչ տրամաբանությամբ են հիմա որոշել այնտեղ դիտորդներ ուղարկել: Որ ի՞նչը վերահսկեն:
Ենթադրում ենք, որ սա ռուսներին այստեղից դուրս մղելու հերթական քայլն է: Ու եթե հիմա խոսվում է օդանավակայանում ռուսական սահմանապահ ծառայողներին հանելու մասին, ապա առաջիկայում կոչ է արվելու նաև հայ-թուրքական սահմանից հանել ռուսական սահմանապահ ուժերը:
Ու հայ-թուրքական սահմանը կներկվի կանաչ գույնով: