Գեղարքունիքի մարզում՝ Շորժա-Սևանա լճի թերակղզի ճանապարհահատվածում, սեպտեմբերի 19-ին կանցկացվի «Հայաստանի Հանրապետության Վարչապետի գավաթ» սիրողական խճուղային հեծանվավազքի մրցաշարը:
Մրցաշարին չեն կարող մասնակցել այն անձինք, որոնք վերջին 3 տարվա ընթացքում մասնակցել են հեծանվային սպորտի ՀՀ և միջազգային առաջնությունների:
Մասնակիցները պետք է մրցավայր ներկայանան իրենց անձնական հեծանիվներով և սաղավարտներով:
Բացառվում է սպորտային-մրցակցական, էլեկտրական կամ մոտորային հեծանիվներով մասնակցությունը:
«ՉԻ». Ասենք՝ ինչո՞ւ վարչապետի: Միանգամից գրեիք՝ Նիկոլ Փաշինյանի: Մանավանդ, մարդ ես, վաղը կարող է խոհրդարանական համակարգը դարձնեք նախագահական, ստիպված չլինեք մրցաշարը դարձնել «Հայաստանի Հանրապետության Նախագահի գավաթ»:
Բոլոր դեպքերում, լավ նախաձեռնություն է: Պետք է այսպես զարգացնել սպորտը:
Կարելի է կազմակերպել «Հայաստանի Հանրապետության ԱԺ նախագահի գավաթ» սիրողական մաֆիա խաղի մրցաշարը:
Վատ չէր լինի նաև «Հայաստանի Հանրապետության ՔՊ խմբակցության Գավաթ» սիրողական բոքսի մրցաշար ունենայինք:
Անհրաժեշտ է նաև «Հայաստանի Հանրապետության Ռոբերտ Քոչարյանի գավաթ» սիրողական որսի մրցաշարը:
«Հայաստանի Հանրապետության դաշնակների գավաթ» սիրողական հրաձգության մրցաշարը ընտիր կստացվեր:
Մի խոսքով, ահագին մրցաշարերի գործ է բացվել: