Մեր տեղեկություններով՝ օրերս նախկին վարչապետ Հովիկ Աբրահամյանի վարորդ Գրիգոր Գևորգյանը, հանրահայտ Գոքորը, իրեն պատկանող «Հրաշք Այգի» ռեստորանում ողջունելով այդտեղ գտնվող վարչապետ Նիկոլ Փաշինյանին, ձեռքի հետ էլ հաճոյացել է նրան: Գոքորը Նիկոլ Փաշինյանին ներկայացել է իբրև օրինավոր հարկատու բիզնեսմեն՝ ասելով, որ ժամանակին վճարում է բոլոր հարկերը: Նա վարչապետին առաջարկել է անգամ ստուգել մոտ 2 միլիոն դոլար կազմող իր վարկերը: Նշենք՝ Աբրահամյանի նախկին վարորդը պահի տակ մոռացել է «պատմել», որ վերոնշյալ ռեստորանի և այլ օբյեկտների տեր է դարձել նախկին իշխանությունների օրոք և իր նախկին շեֆի բարեհաճությամբ, բնականաբար որոշակի ծառայությունների դիմաց:
Փորձեցինք այս առնչությամբ մեկնաբանություն ստանալ Հովիկ Աբրահամյանի նախկին վարորդ Գրիգոր Գևորգյանից: Նա հաստատեց, որ մոտեցել է իր ռեստորանում խնջույքի մասնակցող Նիկոլ Փաշինյանին: «Մենակ ձեռքով բարևել եմ, ոնց կարայի՞ չմոտենայի, օբյեկտի տերն եմ վերջապես: Հայաստանի վարչապետն ա, ոնց կլներ իրան չդիմավորեի: Ընդհանրապես ոչ մի բան չեմ արել, ոչ իրանց սեղանին նստել եմ, ոչ մնացել եմ: Թոռներիս արև, երեխեքիս արև, հորս գերեզման, ըտենց բան չի եղել, բարևել եմ, էդքան բան: Հիմա դուք հավատո՞ւմ եք էդ հեքիաթներին: Կարաք ախռանիկներից հարցնեք, ըտենց բան հորս գերեզման չի եղել, մենակ բարևել եմ»:
Մելանյա Ծառուկյան