Շաբաթ օրը հաղորդագրություն և դրան կից մի լուսանկար հրապարակվեց, որում ասվում էր, թե Սերժ Սարգսյանը Ծաղկաձորում կուսակցական միջոցառում է անցկացրել: Խորհրդային ոճով կազմված հաղորդագրության մեջ չէր նշվում, թե ինչու է Սարգսյանը հասել Ծաղկաձոր և ինչ խնդիրներ է քննարկել կուսակցականների հետ: Միայն նշվում էր, որ ինչ-որ սոցիոլոգիական հարցումների արդյունքներ են քննարկել: Բայց կոնկրետ ինչ՝ չի նշվում:
«ՉԻ». Եվ քանի որ չի նշվում, մենք փորձենք հասկանալ, թե ինչ հարցումների մասին է խոսքը՝ հաշվի առնելով ՀՀԿ-ի ներկայիս վիճակը և Սերժ Սարգսյանին առաջնահերթ հուզող հարցերը: Թերևս քննարկվել են այսպիսի հարցեր:
1. Հայաստանցիների քանի տոկոսը կդառնա երջանիկ, եթե Սերժ Սարգսյանը ձերբակալվի:
2. Արդյո՞ք այդ ցուցանիշով շատ են զիջում առաջատարին՝ Ռոբերտ Քոչարյանին:
3. Ամենաշատն ում աշոտյան անելու դեպքում կարելի է մի փոքր դրական ֆոն ստեղծել կուսակցության հանդեպ:
4. Ազգաբնակչության քանի տոկոսն է Էդուարդ Շարմազանովի մասին հիշատակելիս նշում կամ գրում միայն նրա ինիցիալները՝ ԷՇ:
5. Այս տեմպերով դեռ քանի՞ տարի կբավականեցնեն Արփինե Հովհաննիսյանի ռեսուրսները:
6. Քանի տոկոսն է հավատում, որ Միքայել Մինասյանը իր մեդիակայսրությունը ստեղծել է առանց աներոջ հովանավորչության:
Հուսով ենք, որ ՀՀԿ-ն, հավատարիմ մնալով իր ժողովրդավարական անցյալին ու ներկային, հասարակությանը նույնպես կծանոթացնի սոցիոլոգիական հարցումների արդյունքներին: