«- Դուք Նիկոլ Փաշինյանի հրաժարականի պահանջին միանո՞ւմ եք։
- Իսկ դուք չե՞ք կարծում, որ ես իմ հրաժարականով այդ հարցին պատասխանել եմ արդեն»։
Սա հատված էր Սյունիքի նախկին մարզպետ Հունան Պողոսյանի՝ «Հրապարակ» թերթին տված հարցազրույցից:
«ՉԻ». Բացարձակապես խնդիր չունենք Հունան Պողոսյանի հետ: Ինչ արել է՝ լավ է արել, մի բան էլ քիչ է արել:
Խնդիրը Նիկոլ Փաշինյանի կադրային քաղաքականության մեջ էր: Քանի որ իրեն համեմատում էր Հիսուսի հետ, թերևս մտածել է, որ Հունանն էլ իր Պողոս առաքյալն է: Դարձի կբերի, և Հունանը կդառնա հեղափոխության ամենաջերմեռանդ քարոզիչներից մեկը:
Պարոն Փաշինյան, Հունանը երկու տարի աշխատեց մարզպետ՝ ջարդե՞ց նարկոտրաֆիկի մեջքը, թե՞ մի թեթև մերսում արեց:
Այսօր Սյունիքի համայնքապետների պահվածքի մեջ իր մեղավորությունն ունի նաև նախկին մարզպետը: Երկու տարվա ընթացքում Սյունիքում տիրող ֆեոդալական կարգերը, վախի մթնոլորտը ոչ միայն չեն նահանջել, այլ նաև նոր հորիզոններ են նվաճել: Ի՞նչ էր անում կառավարությունը, երբ Քաջարանի պղնձամոլիբդենային կոմբինատի ղեկավարությունը ֆրոնդա էր նախապատրաստում, իսկ նախկին ոստիկան Պողոսյանը այդ ամենին դիտորդի աչքերով էր նայում:
Այնպես որ, ցույցերը դաժանությամբ ճնշող Պողոսյանը ճիշտ է, սխալ են նրան ամենակարևոր մարզը վստահողները: