Լավ, լավ, մի խառնվեք իրար, հանգստացեք, Առաջին նախագահը նոր հարցազրույց չի տվել: Ավելի ճիշտ՝ շատ նոր:
Ավելին, նույնիսկ ասել է, որ առայժմ զերծ կմնա հարցազրույց տալ տեղական, արտասահմանյան լրատվամիջոցներին, որոնք այս օրերին տասնյակներով դիմում են Նախագահի գրասենյակ, որպեսզի գոնե մի կեսբերան խոսի, բայց նա անդրդվելի է:
Բայց այս փակուղային իրավիճակից ելք կա: Եթե նոր հարցազրույց է պետք, ապա լրատվամիջոցներին խորհուրդ կտանք ձևակերպել հարցերը, հետո այդ հարցերի պատասխանները գտնել Տեր-Պետրոսյանի տասնյակ հոդվածներում, հարցազրույցներում: Այս քսան և ավելի տարվա ընթացքում մարդը ղարաբաղյան հակամարտության կարգավորման հետ կապված բոլոր հարցերը բարձրաձայնել է, ու ինքն էլ տվել է դրանց պատասխանները՝ սպառիչ ու հասկանալի կերպով:
Միայն Ագնեսա Խամոյանին ու Պետրոս Ղազարյանին տված հարցազրույցները այս մեկ ամսվա ընթացքում հասցրել են հազար կտոր անել և տարածել: Վերցրեք, այդ կտորներով նոր հարցազրույց սարքեք, և դա նորույթ կլինի: Մեկ է, հիմա այդ դրվագներից որն էլ համացանցում տեղադրում են, մարդկանց մի մասը տակը գրում է. «Վա՜յ, խի Լևոնը սենց բա՞ն է ասել» կամ՝ «բա ինչի՞ շուտ չէր ասել»:
Այնպես որ, լրատվամիջոցները դեռ շանս ունեն Տեր-Պետրոսյանի հետ նոր հարցազրույց անել: