ՀՀ փոխվարչապետի պաշտոնակատար Տիգրան Ավինյանը լրագրողների հետ զրույցում հայտարարել է. «Սահմանային լարվածություններին պետք է տալ սիմետրիկ պատասխան, բայց հնարավորինս զսպված»:
«ՉԻ». Տիգրան Ավինյանը բուհում սովորելու ընթացքում երևի «բոտանիկ» է եղել: Այսինքն՝ սենց, սուսիկ-փուսիկ, որ մեկը մի բան էր ասում, հնարավորինս զուսպ պատասխանում էր, եթե իհարկե պատասխանում էր:
Երևի այնտեղից է կառավարություն տարել զսպվածությունը:
Այո, եթե ադրբեջանցին դիմացի պոստից 40 կրակոց է արձակում մեր վրա, մենք էլ պետք է 40 անգամ կրակենք, բայց «խալաստոյ» պատրոններով: Համ սիմետրիկ է, համ էլ՝ զսպված:
Կամ եթե ադրբեջանցի զինվորը դիմացի պոստից մեզ միջնամատ է ցույց տալիս, մենք էլ պետք է միջնամատ ցույց տանք, բայց առանց ձեռքը գրպանից հանելու:
Իսկ եթե ադրբեջանական ջոկատները 100 մետր առաջ են գալիս, մենք պետք է սիմետրիկ պատասխանենք և քաղաքավարի նրանց բացատրենք, որ չի կարելի 100 մետր առաջ գալ:
Ահա այսպես, մանրից դառնում ենք տարածաշրջանի ամենազսպունակ ազգը: