Դեկտեմբերի 5-ի ՏԻՄ ընտրություններին դեռ բավական ժամանակ կա, սակայն մեր տեղեկություններով՝ այս օրերին ՔՊ կուսակցության մարզային գրասենյակներում նախընտրական թոհուբոհ է, համանքապետներին կանչում են մարզային գրասենյակներ՝ հորդորելով ընտրել «Քաղաքացիական պայմանագրի» թեկնածուներին: Մասնավորապես Արարատի մարզի Արտաշատ համայնքի ղեկավարի պաշտոնակատար Կառլեն Մկրտչյանը Արտաշատի տարածաշրջանի մեջ մտնող բոլոր համայնքների ղեկավարներին հրավիրել է ՔՊ գրասենյակ՝ ընտրությունների ելքը ապահովագրելու և ՔՊ թեկնածուին սատարելու երաշխիքներ ստանալու համար:
Մեր հավաստի աղբյուրի փոխանցմամբ՝ հավաքին ներկա համայնքների ղեկավարները հավատարմության երդում են տվել ու խոստացել ընտրողների պատշաճ մասնակցություն ապահովել, հետևապես նաև՝ քվեների առավելագույն թիվ:
Տեղեկությունը ճշտելու համար զանգահարեցինք Կառլեն Մկրտչյանին, վերջինս խոստացավ 20 րոպեից անպայման պատասխանել մեր հարցերին, սակայն 20 րոպեից նրա բջջայինն արդեն անհասանելի էր:
Իսկ Ազատավան համայնքի ղեկավար, ԲՀԿ անդամ Պետիկ Ղազարյանը հաստատեց, որ հոկտեմբերի 29-ին ՔՊ կուսակցության գրասենյակում Արտաշատ համայնքի ղեկավարի պաշտոնակատարն ու տարածաշրջանի համայնքների ղեկավարները հանդիպել են: Քննարկե՞լ են արդյոք ՏԻՄ ընտրությունների մասին հարցեր՝ Ազատավանի ղեկավարը հրաժարվեց պատասխանել, հայտարարելով՝ «դա մեր ներքին քննարկման հարցն է»:
Մ. Ծառուկյան