«ՉԻ» խմբակցություն
Հաշվի առնելով Բելառուսում տեղի ունեցած նախագահական ընտրությունների ավարտն ու հետընտրական զարգացումները,
Առաջնորդվելով 2018թ. թավշյա հեղափոխության կարգախոսներով,
Առաջարկում ենք հրատապ ընդունել նոր օրենք շնորհավորանքների մասին:
Սույն օրենքի ընդունումը կնպաստի Հայաստանի միջազգային հեղինակության աճին և ներքաղաքական կյանքի սղաճին:
Եվ այսպես.
Օրենք Շնորհավորանքի մասին (նախագիծ)
Հոդվ. 1. Շնորհավորանքը քաղաքական անհրաժեշտություն է:
Հոդվ. 2. Հայաստանում շնորհավորելու լիազորություններ ունեցողների ցանկը հաստատվում է «Իշխանությունների մասին» օրենքի համաձայն:
Հոդվ. 3. Հանրապետության վարչապետը.
ա) շնորհավորում է այլ երկրների ղեկավարներին՝ անկախ վերջիններիս հավաքած ձայներից, ընտրությունների լեգիտիմությունից և հետընտրական զարգացումներից:
բ) այլ երկրների ղեկավարներին շնորհավորում է ընտրությունների ավարտից ոչ ուշ, քան՝ 24 (քսանչորս) ժամվա ընթացքում:
գ). Սպասում է, որպեսզի առնվազն 2 (երկու) այլ երկրների ղեկավարներ շնորհավորեն այլ երկրի ղեկավարին, նոր ինքը շնորհավորի:
դ) Շնորհավորական ուղերձում խուսափում է օգտագործել հեղափոխական արտահայտություններ (դուխով, թավիշ, ասֆալտ, քայլ արա´, հանցավոր ռեժիմ և այլն):
Հոդվ. 3. Հանրապետության նախագահը.
ա) հաստատում է Հանրապետության վարչապետի շնորհավորանքը ոչ ուշ, քան՝ 72 (յոթանասուներկու) ժամվա ընթացքում:
բ) Հանրապետության վարչապետի շնորհավորանքը հաստատելուց ոչ ուշ, քան՝ 6 (վեց) ժամվա ընթացքում մի հատ էլ ինքն է շնորհավորում:
գ). դիմում է ՍԴ-ին՝ Շնորհավորանքի տեքստի համապատասխանությունը սահմանադրական նորմերին պարզելու համար:
Հոդվ. 4. Ազգային Ժողովը.
ա) Հանրապետության վարչապետի Շնորհավորանքից հետո ոչ ուշ, քան՝ 960 (ինը հարյուր վաթսուն) ժամվա ընթացքում մտածում է, թե ինչ ասի:
բ) Հանրապետության վարչապետի Շնորհավորանքից հետո սահմանված ժամկետում բան չմտածելու դեպքում ավտոմատ մեկնում է արձակուրդ:
Հուսով ենք՝ խորհրդարանը սույն նախագիծը կընդունի միանգամից և առանց սրբագրումների, ինչը կխթանի աշխարհաքաղաքական դաշտի առողջացումը: