ՀՀԿ անդամ Տիգրան Վարդանյանը ֆեյսբուքյան իր էջում գրել է. «Ես հրապարակավ հայտարարում եմ, որ այլևս երբեք չեմ այցելելու «Երևան պանդոկ», քանզի վերջիններս ընդունել են ադրբեջանցի պատգամավորներին:
Լավ ա էլի, ադրբեջանցիք Երևանում հոխորտան քիչ չէ, մի բան էլ հյուրընկալեք, պատվեք, հարգեք դրա՞նց: Անունը փոխեք ու վերանվանեք «Էրիվան պանդոկ»: Ամոթ ա:
Կոչ եմ անում բոլորիդ, որպեսզի դուք ևս բոյկոտեք ու չայցելեք այդ վայրը»:
«ՉԻ». Հարյուր տոկոս: Էս ի՞նչ ա: Ո՞նց թե, գնացել են պանդոկ ու այնտեղ իրենց հաց են տվել: Իյա՜, իրո՞ք: Բոյկոտ. մինչև վերջին խազը բոյկոտ:
Բայց մենակ «Երևան» պանդոկով գործը չպիտի վերջանա: Էդ ադրբեջանցի պատգամավորները «Զվարթնոց» օդանավակայանում են, չէ՞, իջել, բագաժը վերցրել: Այսինքն՝ իրենց այնտեղ սպասարկել են: Լավ ա, էլի, իմանալով, որ գալու են, այստեղ հոխորտան: Պետք է հրապարակավ բոյկոտել և հայտարարել, որ այսուհետ երբեք «Զվարթնոց» օդանավակայան չենք այցելելու:
Հաջորդը. այդ ադրբեջանցիները օդանավակայանից Իսակովի պողոտայով են Երևան մտել: Ինչի՞ հայ գայիշնիկները նրանց չեն կանգնեցրել ու արգելափակել նրանց մուտքը: Չգիտեի՞ն, որ գալու են, այստեղ հոխորտան: Ուրեմն, պետք է բոյկոտել ԳԱԻ-ն ու այսուհետ այլևս չայցելել «փոսի գաի»:
Մի հատ պետք է ճշտել, թե էդ ադրբեջանցիք ո՛ր հյուրանոցում են գիշերել: Մի հատ իմանանք, թե այդ ո՞ր անաբուռ, անհայրենիք հյուրանոցն է, որ դրանց տեղաց է արել, անկողին տվել, հետո նրանց գնալուց հետո սենյակները մաքրել: Եթե «Արմենիա Մարիոթն» է, բոյկոտում ենք ու վերանվանում «Էրմենիստան Մարիոթ», իսկ եթե «Կոնգրես» հյուրանոցն է, վաբշե ենք բոյկոտում ու վերանվանում «Մեջլիս» հյուրանոց:
Այս բոյկոտները խիստ անհրաժեշտ են մեր ազգին, թե չէ կապերը լրիվ կորցրել են:
Հ.Գ. Մենք «Երևան Պանդոկը» բոյկոտելու ենք կիրակի օրվանից, քանի որ շաբաթ օրը խաշի ենք: