ՀՀ վարչապետ Նիկոլ Փաշինյանն իր ֆեյսբուքյան էջում գրել է. «Համաշխարհային զբոսաշրջային կազմակերպության կողմից փետրվարի 4-ին հրապարակված բարոմետրի համաձայն՝ Հայաստանը 2019-ին զբոսաշրջության ոլորտում ամենաարագ զարգացող ուղղությունների շարքում զբաղեցրել է 12-րդ տեղը աշխարհում:
Թուրքիան և Ադրբեջանը տուրիզմի աճի իրենց տվյալներով զիջել են Հայաստանին՝ զբաղեցնելով համապատասխանաբար 13-րդ և 17-րդ տեղերը՝ 14% եւ 11.4% աճով։
Վրաստանն ընդհանրապես տեղի չի զբաղեցել տուրիզմի ոլորտում ամենաարագ զարգացող 20 երկրների շարքում»:
«ՉԻ». Հա, լավ է, որ Հայաստանը 2019-ին զբոսաշրջության ոլորտում ամենաարագ զարգացող ուղղությունների շարքում զբաղեցրել է 12-րդ տեղը, անցել է Ադրբեջանին ու Թուրքիային: Ապրեք: Կեցցեք: Շեն մնաք:
Բայց վարչապետին խորհուրդ կտայինք նման բաներ գրելուց մի փոքր նրբանկատ լինել, և գոնե հարևան Վրաստանի մասին այդպիսի արհամարական տոնով չգրել: Կարելի էր Վրաստանի անունն ընդհանրապես չտալ: Դրանից Հայաստանի 12-րդ տեղը չէր փախչի:
Ի վերջո, Նիկոլ Փաշինյանի գրառումները նաև Վրաստանում են կարդում ու իրենց զբաղեցրած տեղի մասին նման կերպ արտահայտվելը կարող են վիրավորական համարել: Չենք զարմանա, որ կոշտ արձագանքներ լինեն այնտեղից: Վրաստանը մեր հարևանն է, բարեկամն է, ընկերը, ռազմավարական դաշնակիցը, իսկ ընկերոջ, բարեկամի մասին այդպես չեն գրում: Որովհետև այդպես կարող ես կորցնել ընկերոջը:
Հ.Գ. Դավիթ Խաժակյանին սա փոխանցեք, որ «բեսեդկայի զրույցների» լևելից դուրս գա: