ՀՀ պարետ Տիգրան Ավինյանը հայտնել է համավարակով պայմանավորված երկրում կիրառվող սահմանափակումների նոր որոշման մասին:
Վերաբացվել են՝
- Հանրակրթությունը, որը մեկնարկելու է սեպտեմբերի 15-ից
- Բուհական կրթությունը. սեպտեմբերի 1-ից առկա ուսուցմամբ հաճախելու են միայն բակալավրիատի 1-ին կուրսերը, մնացածի մասով՝ իրականացվելու է հիբրիդային (հեռավար տեսական և առկա գործնական պարապմունքներ) եղանակով ուսումնական գործընթաց
- Ոչ ֆորմալ և շարունակական կրթությունը մի շարք ուղղություններով։ Միաժամանակ, դեռևս պահպանվում են սահմանափակումները արտադպրոցական սպորտային, արվեստի և մշակութային խմբակների մասով
- Գրադարանները
- Թանգարանները
Այսուհետ դիմակ կարող են չկրել՝
- Հեռուստահաղորդավարները, եթե հեռուստահաղորդումների և հեռուստածրագրերի հեռարձակման ժամանակ հեռուստատեսային տաղավարում գտնվում են մենակ
- Հեռուստահաղորդումների հեռարձակման ժամանակ սուրդոթարգամանություն իրականացնող մասնագետները։
- Մեկ սեղանի շուրջ թույլատրվում է մինչև 8 անձի նստեցում՝ նախկին 5 անձի փոխարեն:
«ՉԻ». Այնպիսի տպավորություն է, որ հակահամաճարակային նոր կանոններ սահմանելիս պարետը առաջնորդվել է «ղուշ-գիր» սկզբունքով: Օրինակ՝ հին կանոններով թույլատրվում էր, որ սեղանի շուրջ 5 անձ նստեր, հիմա՝ 8 անձ:
Թե ինչու 8, որովհետև «ղուշ-գիր» են գցել, 8-ի վրա է ընկել: Ուրիշ տրամաբանական բացատրություն չկա: Մանավանդ, որ 5 անձի դեպքում կանոնները չէին գործում, 8 անձի դեպքում էլ չեն գործելու:
Կամ որևէ մեկը կարո՞ղ է բացատրել, թե ինչու 1-ին կուրսի ուսանողները պետք է գնան դասերի, իսկ մնացածները՝ հիբրիդային: Այսինքն՝ կամ կգնան, կամ էլ՝ չեն գնա: Այսինքն՝ 1-ին կուրսի ուսանողները վարակվելու կամ վարակելու պրոբլեմ չունեն, իսկ ավելի բարձր կուրսի ուսանողները՝ վարակ տարածելու օջախ են:
Քանի՞ ամիս է, ինչ գործում են սահմանափակումները: Շուտով կես տարի կլինի: Այդ ընթացքում բազմաթիվ սահմանափակող կանոններ են սահմանվել: Ու այդպես էլ այդ կանոններում ոչ մի տրամաբանություն չգտանք: Կիսատ-պռատ սահմանափակումներ չեն լինում: Ինչպես կիսահղի մարդ չի լինում:
Մեկ էլ, մեզ հետաքրքիր է, բա մինչև այս սահմանափակումները վերացնելը հեռուստահաղորդումների ժամանակ սուրդոթարգամանություն իրականացնող մասնագետները ո՞նց են աշխատել դիմակներով:
Սուրդոթարգամանության ժամանակ նրանք խոսում են, և լսողական խնդիրներ ունեցողները նրանց շուրթերով են ընթերցում լուրերը: Եթե շուրթերը փակ են եղել դիմակով, ապա ո՞ւմ համար են սուրդոթարգմանիչներն աշխատել: