Այն, որ Սոֆյա Հովսեփյանը որևէ կերպ չէր համապատասխանում հեղափոխության միջոցով իշխանության եկած ուժի պատգամավորի կարգավիճակին, կասկած չի հարուցում: Տիկինը երկու տարվա ընթացքում այնքան հետադիմական և կիսագրագետ մտքեր է արտահայտել, որ հանգիստ կարող էր լինել «Երկիր Ծիրանի» կուսակցության անդամ: Եվ թերևս լիներ, եթե չլիներ հեղափոխությունը և Նիկոլ Փաշինյանի համառությունը խմբակցությունը կազմավորել Նոյի Տապանի մոտիվներով:
Բայց անդրադարձը նվիրված չէ Սոֆյային: Անդրադարձը նվիրված է իշխող ուժին, որը դատապարտում է 17-ի վարքագիծը առ այն, որ ժողովրդին անվանում է ժեխ, բայց իրենք էլ պակաս պիտակավորումներ չունեն նույն ժողովրդի հասցեին:
2017 թվականի ընտրություններից հետո, Ալեն Սիմոնյանը հայտարարեց, թե երկրում կա 1 միլիոն համբալ, ովքեր վաճառում են իրենց ձայնը:
Արդեն իշխանության գալուց հետո, Բաբկեն Թունյանը հայտարարեց, որ հարևան պողոսները չպետք է մասնակցեն և կարծիք հայտնեն ռազմավարական նշանակություն ունեցող հարցերի վերաբերյալ:
Հիմա էլ ՔՊ խոսնակը հայտարարում է, որ ժողովուրդը կընտրեր Նիկոլի ուսապարկին, եթե Սոֆյայի փոխարեն Նիկոլը ուսապարկին տեսներ որպես պատգամավոր:
Հիմա ի՞նչ տարբերություն Նաիրա Զոհրաբյանի և խոսնակի միջև: Փաստացի նրանք համամիտ են ժողովրդի ինտելեկտի վերաբերյալ, քանի որ միայն ժեխը կարող է ուսապարկին իբրև պատգամավոր ընտրել:
Այնպես որ, ճիշտ կլինի իշխող ուժը և 17-ը մի կողմ դնեն մարտավարական տարաձայնությունները և հաջորդ ընտրություններին մասնակցեն մեկ միասնական թիմով: Կարգախոսն էլ կարող է լինել մոտավորապես այսպիսին՝ «Ուսապարկն է ձեր պատգամավորը, ժեխ համբալներ»: