«Իրենց կյանքում չկայացած մարդիկ Վանոյին ստիպեցին, որ հեռանա: Մեր պետությունն այդ օրվանից ունի մեծ կորուստ»,- Armlur.am-ի հետ զրույցում հայտարարել է ԲՏԱ նախարար Վահագն Խաչատուրյանը:
«ՉԻ». Դժվար է չհամաձայնել Երևանի նախկին քաղաքապետ, իսկ այժմ նախարար Վահագն Խաչատուրյանի հետ: Այն, ինչ ծրագրել էին անել Հայաստանի հետ որոշ չկայացած մարդիկ, չէին կարող անել, եթե Վանո Սիրադեղյանը մնար ազատության մեջ:
Նախկինների մասով ամեն ինչ պարզ է, նրանց դրդապատճառները վաղուց են բացահայտված: Իսկ ի՞նչ կարծիքի է պարոն նախարարը ներկաների դրդապատճառների մասին, նրա՛նք ինչու չվերադարձրեցին Վանո Սիրադեղյանին: Սա ավելի կարևոր և արդիական է:
Ի՞նչ բնութագիր կտա նախարարը գործող ղեկավարին: Գուցե նա՞ էլ պակաս չկայացածը չէ և իր չկայացածության ֆոնին սարսափում էր Վանո Սիրադեղյանի ներկայությունից Հայաստանում:
Ինչո՞ւ վարչապետի պաշտոնում երբեք չարտահայտվեց Վանո Սիրադեղյանի նկատմամբ իրականացված հաշվեհարդարի վերաբերյալ: Ինչո՞ւ երբեք քաղաքական գնահատական չհնչեցրեց:
Վազգեն Մանուկյանից մի քանի անգամ ներողություն խնդրելու փոխարեն թերևս մեկ անգամ ներողություն խնդրեր Վանո Սիրադեղյանից, որ քաղաքական և իրավական անկարողություն է դրսևորում ու չի կարողանում նրան Հայաստան վերադարձնել: