Ռուսաստանի Պետդումայի ԱՊՀ գործերով, եվրասիական ինտեգրման հարցերով հանձնաժողովի նախագահ Լեոնիդ Կալաշնիկովը հայտարարել է. «Ես հայերին ասել եմ, որ այդ դո՛ւք չեք մեր դաշնակիցները, մենք ենք ձեր դաշնակիցները:
Մենք ձեզ փրկել ենք և՛ թուրքական ոճիրի ժամանակ, փրկում ենք և հիմա: Որտե՞ղ կլինեիք… պետք է ազնիվ լինել:
Այդ դուք չեք մեր դաշնակիցները, դուք չեք գնա կռվեք Ղրիմի համար, որը չեք ճանաչել, դուք նույնիսկ Ղարաբաղը չեք ճանաչել»:
«ՉԻ». Ժամանակին, այսինքն՝ 2005 թվականին, Ռուսաստանի Պետդումայի նախագահ Բորիս Գրիզլովը հայտարարեց, թե Հայաստանը Ռուսաստանի ֆորպոստն է:
Մենք հիշում ենք, թե այդ արտահայտությունն ինչ աղմուկ բարձրացրեց. Ռուսաստանի հետ հարաբերությունների վերանայման կոչեր հնչեցին, քաղաքական և քաղաքացիական մի շարք ուժեր պահանջեցին, որ Գրիզլովը ներողություն խնդրի կամ պարզաբանի ասածները: Իհարկե, քոչարյանական իշխանությունը ձայն չհանեց, գերադասեց լռել, հնարավոր է՝ Քոչարյանը միայն ուրախ էր, որ Հայաստանը դարձնում է Ռուսաստանի ֆորպոստ, բայց, բոլոր դեպքերում, շուխուրը մեծ էր:
Իսկ հիմա ընդհանրապես ծպտուն չկա: Դաշնակներն ու այլ հինավուրց ուժերը զբաղված են Եվրախորհրդով, իշխանություններն էլ պատրաստվում են տոնել իրենց մանդատավոր հաղթանակը:
Մինչդեռ այս խոսքերի հեղինակը պատահական մարդ չէ, ռուսական խորհրդարանի հանձնաժողովի նախագահ է: Ու ձեզ ասենք՝ եթե նա իմանար, որ նման հայտարարությունները կարող են ալեկոծել Հայաստանի քաղաքական դաշտը, հարուցել ընդդիմության և իշխանության զայրույթը, հաստատ նման բան չէր ասի: Բայց նա տեսնում է, թե ինչ է կատարվում այստեղ: Ու նման հայտարարությունը առաջին հերթին ցույց է տալիս մեր պետության ողբալի վիճակը, եթե նրա մասին այսպիսի անթաքույց արհամարհանքով ու հեգնանքով են խոսում: