«Մեկ Հայաստան» կուսակցության քաղխորհրդի անդամ Վլադիմիր Մարտիրոսյանը ֆեյսբուքյան իր էջում գրել է. «Հետաքրքիր է, Փաշինանի իշխանության ներկայացուցիչները վերջին անգամ ե՞րբ են հանդիպել իրենց միջին վիճակագրական ընտրողին կամ հեղափոխության աջակցին և լսել, թե ի՞նչ են մտածում նրանք այս իշխանության մասին: Գահավիժում եք ահռելի արագությամբ, նույնիսկ արձակուրդային տխմար PR «լեռը մուկ ծնեց» ինքնավստահություն չանելու անթույլատրելիությունն եք սկսել արհամարհել»:
«ՉԻ». Չիմացողների համար շեշտենք, որ սույն քաղաքական միավորի ղեկավարը Արթուր Ղազինյանն է: Իսկ, եթե նրան էլ տեղը չբերեցիք, ապա նա մեկն է, որը մեկ տարուց ավել է, ինչ կուսակցություն է ստեղծել, բայց երբեք գոնե մի 10 հոգանոց հավաք չի կազմակերպել Հայաստանի քաղաքացիների հետ՝ նախընտրելով ամբողջ օրը լինել վիրտուալ տիրույթում և մեկը մեկից զավեշտալի գրառումներ անել:
Բայց անգամ ամբողջ օրը սոցիալական ցանցերում հերթապահելով՝ չեն տեսել, որ վարչապետը գրեթե ամեն օր շփվում է Հայաստանի քաղաքացիների հետ, այցելում այնպիսի համայնքներ, որտեղ Ղազինյանի և Մարտիրոսյանի պատրոնները երբեք ոտք չեն դրել և չեն էլ ենթադրում, որ այդպիսի գյուղ կա Հայաստանում:
Գահավիժելու մասով միայն մասնակի կարելի է համաձայնել Մարտիրոսյանի հետ: Առնվազն գահավիժում ենք իրավական ոլորտում, քանի որ մայր բուհի իրավաբանական ֆակուլտետը շարունակում է երկրին մատուցել հիմնականում անգրագետ, օրենքի փոխարեն փողին նվիրված իրավաբանների: Իսկ թե ինչու է այդպես, Մարտիրոսյանը ճիշտ կանի հարցնի կուսակցական բոսսի հայրիկին՝ իրավաբանական ֆակուլտետի դեկան Գագիկ Ղազինյանին: