ԱԺ «Իմ քայլը» խմբակցության պատգամավոր Արթուր Մանուկյանը, «Հրապարակի» հետ զրույցում անդրադառնալով Ադրբեջանում պահվող հայ գերիների խնդրին, ասել է. «Գերիների հարցն ինչքան մերն ա, էնքան էլ ռուսներինն ա, նաև՝ աշխարհինը, նկատի ունեմ ոչ հուզական և էմոցիոնալ իմաստով, այլ՝ քաղաքաիրավական։ Ռուսներն են գարանտ՝ այդ հարցը լուծելու, եթե նրանք ի վիճակի չեն, ի՞նչ ասեմ»:
«ՉԻ». Հեչ, ի՞նչ պիտի ասես: Մանդատդ վայր դիր ու գնա դերասանությամբ զբաղվիր, եթե քո փոխարեն ռուսները պետք է զբաղվեն մեր հարցերով: Ի՞նչ իմաստ ունի պատգամավոր լինել, աշխատավարձ ու պարգևավճար ստանալ, եթե ի վիճակի չեք պետության կարևորագույն խնդիրները լուծել և հույսը դնում եք օտարների վրա:
Այսինքն՝ ոչ թե նույնիսկ հույսն են դնում, այլ պատասխանատվությունը: Ասում են՝ մենք ի՞նչ, թող ռուսները մտածեն:
Այդ դեպքում եկեք Պուտինին առաջարկենք, թող մասնակցի խորհրդարանական ընտրություններին: Չնայած, դժվար թե համաձայնվի. գիտի, որ չի ընտրվի, նույնիսկ մի գերիների հարց չի կարողանում լուծել: