ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ խորհրդարանական ճեպազրույցների ժամանակ անդրադառնալով ԱԺ «Իմ քայլը» խմբակցության պատգամավորների հեղինակած Սահմանադրության փոփոխությունների նախագծին, ասել է. «Այն տեքստին, որը պետք է քննարկվի այսօր, մենք նոր ենք ծանոթացել և ծանոթացել ենք ոչ թե պաշտոնական կայքից, այլ լրատվամիջոցների հրապարակումներից»:
«ՉԻ». Էն սիլոգիզմը լավ բան է: Մեզ շատ դուր եկավ: «Լուսավորի» ժողովուրդի դեպքում պետք է հաճախ կիրառել, թե չէ ճար չկա:
Եվ ուրեմն, «Լուսավոր Հայաստան» խմբակցության պատգամավոր Տարոն Սիմոնյանը Սահմանադրության փոփոխությունների նախագծին ծանոթացել է լրատվամիջոցների հրապարակումներից: Հարց է առաջանում. իսկ լրատվամիջոցները որտեղի՞ց են ծանոթացել նախագծին:
Պատասխան՝ ԱԺ պաշտոնական կայքից:
«Խոդի» ենք գցում սիլոգիզմը ու եզրակացնում. պատգամավոր Տարոն Սիմոնյանը խորհրդարանի պաշտոնական կայքի տեղը չգիտի: Կամ՝ հասցեն սխալ է գրում: Կամ՝ տեղյակ չէ, որ կայքում քննարկվելիք նախագծերի տեքստերը նախօրոք տեղադրվում են: Կամ՝ մինչև հիմա մտածում է, թե խորհրդարանի աշխատանքների օրակարգը պատվիրված նամակով պիտի ստանա, որ տեղյակ լինի, թե ինչ է քննարկվելու: Կամ էլ, և սա ամենահավանականն է՝ զահլա չունի մտնի պաշտոնական կայքեր և ծանոթանա խորհրդարանի նիստերի օրակարգին:
Ի՞նչ կարող ենք խորհուրդ տալ ԼՀԿ պատգամավորին. լրատվամիջոցների հրապարակումներին հետևելիս անպայման ճշտել, թե ինչ աղբյուրներից են օգտվում, ու այդպես՝ քայլ առ քայլ, կսովորի պաշտոնական կայքերի տեղը: