Գեղարքունիքի մարզպետ Գնել Սանոսյանն այսօր հայտարարել է. «Համայնքների ղեկավարները, որոնք արտահերթ խորհրդարանական ընտրությունների ժամանակ խայտառակ պարտություն են կրել իրենց իսկ համայնքներում, պետք է կամավոր հրաժարական տան»:
«ՉԻ». Գնել Սանոսյանին և այսպես մտածողներին մի բան հիշեցնենք, որ այս վերջին ընտրությունների նպատակը նոր խորհրդարան ընտրելն էր: Ինչ-որ չենք հիշում, որ ձեռի հետ նաև Հայաստանի հարյուրավոր համայնքների ղեկավարների վստահության հարցն է դրված եղել:
Սա հին, բարի և ցեղային մտածելակերպն է. եթե որևէ համայնքի ղեկավար, օրինակ, հանրապետական է, ուրեմն այդ համայնքի բնակիչները պետք է բացառապես ՀՀԿ-ին ձայն տան: Եթե չեն տալիս, ուրեմն՝ համայնքապետը վատն է: Պիտի իրերը հավաքի, գնա: Ինչքան ուզում է բացատրի, որ գյուղացիները ոչ թե համայնքապետ, այլ պատգամավոր են ընտրել: Իսկ դրանք, որքան գիտենք, տարբեր բաներ են: Եվ հետո՝ համայնքի ղեկավարները ՏԻՄ ընտրություններով են ղեկավար դարձել, ոչ թե՝ խորհրդարանական:
Մենք էլ ասում ենք. էս ինչի՞ են ընկել Հայկ Մարությանի հետևից: Շատ պարզ պատճառով. ՔՊ-ն Երևանում խայտառակ հաղթանակ չի տարել, այսպես՝ ջախջախիչ, էլի: Այսինքն՝ Հայկ Մարությանը պարտվել է Երևանում: Թե ում է պարտվել, չգիտենք, բայց պիտի գնա: Երևանցիները, իրեն անվստահություն են հայտնել: Լոգիկա ենք ասել: