ԲՀԿ նախկին պատգամավոր Գևորգ Պետրոսյանը ֆեյսբուքի իր էջում գրել է.
«Նիկոլ Փաշինյան, գիտես, ես երբեք անձնական հարցեր չեմ լուծել, քեզ երբևէ չեմ դիմել…
Սա իմ առաջին և, գուցե վերջին խնդրանք-առաջարկն է քեզ…
Եթե կատարես, ես քեզ իմ ելույթներում այլևս չեմ անդրադառնա…
Քարը փեշիցդ թափի, քո սովորության համաձայն՝ արագ կազմակերպի օրենսդրական փոփոխություն, նախարար նշանակվելու համար որոշ պայմաններ հանի և իմ կողքին պատկերված աղջկան (ում դու լավ ճանաչում ես, և ում ֆեյքերդ հանգիստ չեն տալիս) նշանակի Արտաքին գործերի նախարար…»:
«ՉԻ». Նշենք, որ Պետրոսյանի կողքին պատկերված աղջիկը Հունաստանում ապրող Աննա Աբրահամյանն է, որն իր հայտնի լայվերով վերլուծում է միջազգային իրադրությունը:
Վերլուծելը մեղմ է ասված, մի քանի րոպեում այնպիսի աշխատանք է անում, որ սովորաբար տարիներով չեն կարողանում անել աշխարհի առաջատար ուղեղային կենտրոնները: Օրինակ՝ այն, ինչ մեկ լայվի ընթացքում անում է Աննա Աբրահամյանը, Ստրատֆորը անում է մեկ տարվա ընթացքում:
Միևնույն է՝ բանը բանից անցել է: Հայկական դիվանագիտությունից այլևս ոչինչ կախված չէ: Աննան որքան էլ ջանա, չի կարող էլ ավելի վատթարացնել վիճակը:
Եթե Մակունցը կարող է դեսպան աշխատել աշխարհի թիվ մեկ երկրում, ապա Աբրահամյան Աննան էլ կարող է նրա շեֆը լինել: Եթե գժվել, ուրեմն՝ մինչև վերջ: Բացի դրանից, Աննան շատ բուռն խառնվածք ունի, ընդհանրապես խեղճ չի: Առաջին իսկ հանդիպումից հետո Լավրովին կտանեն հիվանդանոց, իսկ Ջեյհուն Բայրամովը կհրաժարվի այլևս հանդիպել ՀՀ արտգործնախարարին, և մեր երկիրը վերականգնվելու ժամանակ կունենա:
Միակ բացասական հետևանքը կլինի այն, որ որոշ ժամանակով կկորցնենք Գևորգ Պետրոսյանի նման ընդդիմադիրին: Կրկեսի մյուս ծաղրածուները ստիպված կլինեն նաև նրա փոխարեն աշխատել: