Մեր տեղեկություններով՝ Արագածոտնի մարզի Ագարակ համայնքի ղեկավարի ժամանակավոր պաշտոնակատար, համայնքի ղեկավարի թեկնածու Արմեն Հարությունյանը համագյուղացիներին հորդորում է մասնակցել ընտրությանը և վստահության քվե տալ իրեն՝ փոխարենը ընտրվելուց հետո համագյուղացիների պահանջները կատարելու խոստումով:
Մեր հավաստի աղբյուրների փոխանցմամբ՝ Հարությունյանը իրեն պատկանող գազալցակայանի կտրոններ է բաժանում ընտրողներին՝ իրենց մեքենաները լիցքավորելու համար: Փորձեցինք լուրի իսկությունը ճշտել հենց Արմեն Հարությունյանից, որն, ի պատասխան մեր հարցադրումների, ասաց.
«Էդ ո՞ւմ ենք խոստում տվել: Ես ոչ մեկին էլ ոչ կտրոն եմ տվել, ոչ էլ՝ են: Իրանք գնում են, լցնում են, փողը վճարում են և գնում են ընտրության: Եվ գնում են, էնտեղից օգտվում են»:
Ընտրողների մասնակցության ակտիվության մասին մեր հարցին թեկնածուն պատասխանեց. «Ես ոչ մտնում եմ ընտրության, ոչ էլ գիտեմ: Ով որ մտնում ա, ով որ ձեզ զանգել ա, իրանից էլ հարցրեք: Վերջում կերևա»:
Հիշեցնենք, որ մարտի 15-ին Արագածոտնի մարզի Ագարակ համայնքում համայնքի ղեկավարի համար ընտրապայքարին մասնակցում էին հինգ թեկնածու:
Մելանյա Ծառուկյան