ԱԺ «Իմ քայլը» խմբակցության պատգամավոր Հովիկ Աղազարյանը ասել է. «Հեղափոխությունից հետո բոլոր դատարանները պետք է լուծարեինք»:
«ՉԻ». Ընդհանրապես, այս իշխանություններին պետք է ձայն տալ ոչ թե նախընտրական, այլ հետընտրական խոստումների համար: Դա իրենց մոտ ավելի լավ է ստացվում: Այդ դեպքում առնվազն մի 80 տոկոս կստանային:
Օրինակ՝ առաջիկա ընտրություններում «Իմ քայլը» պետք է հանդես գա հետևյալ հետընտրական խոստումներով.
1. Պետք է Ադրբեջանի հետ բանակցություններ վարեինք ու հասնեինք խաղաղության:
2. Պետք է մարտի 1-ի գործը բացահայտեինք և մեղավորներին պատժեինք:
3. Պետք է Սահմանադրական դատարանը բարեփոխեինք:
4. Պետք է Սահմանադրությունը փոխեինք:
5. Պետք է վերադառնայինք կիսանախագահական համակարգի:
6. Պետք է ապահովեինք Արցախի անվտանգությունը:
7. Պետք է դատական համակարգի և դատավորների վեթինգ անցկացնեինք:
8. Պետք է գրագետ կադրերով համալրեինք պետական կառավարման համակարգը:
9. Պետք է նախկին կոռուպցիոներներին պատասխանատվության ենթարկեինք:
10. Պետք է ընտրական օրենսգիրքը փոխեինք ու հրաժարվեինք ռեյտինգային համակարգից:
11. Պետք էր հենց սկզբից խելքով մտածել:
Այսքանը բավարար է: Հրաշալի հետընտրական խոստումներ են. միահամուռ մեր ձայնը տանք իշխանություններին: