Արփինե Հովհաննիսյանը ֆեյսբուքի էջում գրել է. «Այսօր հայրենասիրությունից ճառող սորոսականները, ինքնիշխանությունը կեղծավորաբար շահարկող ԱՄՆ ճորտերը պարզորոշ ցույց տվեցին, թե ինչի համար է այս ողջ աբսուրդը»:
«ՉԻ». Տիկինը վերջնականապես կապերից կտրվել է, սկսել է օգտագործել նույն բառապաշարը, ինչ միջին վիճակագրական հանրապետական ֆեյքը:
Մոռացել է, որ անցյալ տարի ցնծության մեջ էին. կարողացել էին երկար ջանքերից, խնդրանքներից ու աղերսներից հետո կազմակերպել Հայաստանում ԱՄՆ դեսպան Թրեյսիի հանդիպումը ամենայն հայոց մերժված Սերժ Սարգսյանի հետ: Եվ այդ, ըստ էության, ընդամենը արարողակարգային հանդիպումից սարքել էին դարի հանդիպում: Թե բա՝ տեսեք, Միացյալ նահանգները Սարգսյանին ընդունում է որպես գործոն: Հետո պարզվեց, որ դեսպանը այցելել է գրեթե բոլոր քիչ թե շատ հայտնի կուսակցություններ:
Աբսուրդի մասով թերևս համաձայնենք: Արփինե Հովհաննիսյանը, Հրայր Թովմասյանը և ներկայիս ևս մի քանի իրավաբանության ռահվիրաներ այնպես են խեղել սահմանադրությունը, որ այս աբսուրդից դուրս գալու միակ ճանապարհը իրենց հեղինակած սահմանադրությունը պատմության աղբարկղ նետելն է:
ԱՄՆ ճորտեր պիտակավորելուց առաջ տիկին Արփինեն չպետք է մոռանա, որ կուսակցական բոսսի ընտանիքը միլիոնավոր դոլարների անշարժ գույք էր ձեռք բերում այդ երկրում: Մի փոքր զգույշ լինելը չի խանգարի, հնարավոր է՝ վանդալները ճորտերի անուն լսեն և առանձնապես խորամուխ չլինելով հարցի էության մեջ՝ հողին հավասարեցնեն Սարգսյանի ընտանիքին պատկանող անշարժ գույքը: Աժ փոխխոսնակի ու արդարադատության նախարարի պաշտոններում Հովհաննիսյանը որևէ օգուտ չտվեց Սարգսյանին, անպայման չէ հիմա էլ վնաս տա:
Եվ ամենակարևորը. կարելի է միայն պատկերացնել Ռուսաստանի դեսպանի դեմքը, երբ նա կարդա, որ Արփինե Հովհաննիսյանը ինչ-որ մեկին անվանում է ճորտ: