ԱԺ ՔՊ խմբակցության պատգամավոր Գևորգ Պապոյանը գրել է. «Իրականում ոչ մի նոր բան չի եղել. հերթական անգամ ցանկանում են ոչնչացնել մեր պետությունը։
Արտասովոր չէ նաև մեթոդը՝ արտաքին և ներքին ուժերը միաժամանակ գրոհում են մեր պետականությունը։
Լուծման համար ևս հեծանիվ հորինել պետք չէ։ Պարզապես չպետք է տրվել օտարերկրյա ուժերին ծառայող 5-րդ շարասյան սադրանքներին, մնալ համախմբված պետություն ունենալու գաղափարի շուրջ և ամեն ինչ լավ կլինի»:
«ՉԻ». Լավ, համարենք, որ իրականում ոչ մի նոր բան չի եղել: Մենք էլ չենք տրվում օտարերկրյա ուժերին ծառայող 5-րդ շարասյան սադրանքներին, պինդ բռնվում ենք համախմբված պետություն ունենալու գաղափարից:
Դե հիմա ասեք, թե այսքանից հետո ոնց պիտի ամեն ինչ լավ լինի: Այսքան տարի հանրությունը վստահել է ձեզ, չի տրվել ձեր այդ ասած 5-րդ շարասյան սադրանքներին, հավատացել է ձեզ, այսինքն՝ իրեն պահել է այնպես, ինչպես դուք եք կոչ արել:
Արդյունքները լա՞վ են եղել: Գոհացուցի՞չ են: Իհարկե, ոչ: Բա եթե մինչև հիմա ձեր արածը բերել է աղետների, թեպետ ձեր ուզած պայմանները եղել են, հիմա ինչի՞ պիտի լավ լինի: «Լավ կլինի, լավ կլինի» ասելով՝ այս օ՞րը նկատի ունեիք: