...

Պատգամավոր ունենք, որ դաջվածքով է, ուրեմն քրեական ենթամշակույթ կրո՞ղ է. ԲՀԿ-ական պատգամավոր

Պատգամավոր ունենք, որ դաջվածքով է, ուրեմն քրեական ենթամշակույթ կրո՞ղ է. ԲՀԿ-ական պատգամավոր

Ազգային ժողովում քննարկվում է Քրեական օրենսգրքում փոփոխություններ կատարելու մասին հարցը: Ըստ օրինագծի՝ առաջարկվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու, ստանալու կամ պահպանելու համար, քրեական ենթամշակույթ կրող խմբավորում ստեղծելու կամ ղեկավարելու համար: 

«Բարգավաճ Հայաստան» խմբակցության պատգամավոր Արտյոմ Ծառուկյանին օրինակ, հետաքրքրում էր, թե ինչ է նշանակում քրեական ենթամշակույթ կրող խմբավորմանը հարել, ինչպե՞ս է քննչական մարմինը որոշելու՝ այս կամ այն մարմինը հարում է այդ խմբավորմանը, թե՝ ոչ: «Պետք է հստակ սահմանել, ինչն է կարելի, ինչը՝ չէ: Առաջին հերթին ես համոզված պնդում եմ՝ եթե մարդը հանցանք չի գործել, ուրեմն չպետք է պատժվի»,- «ՉԻ» հետ զրույցում նշեց պատգամավորը:

- Պարոն Ծառուկյան, իսկ մտավախություն չունե՞ք, որ Ձեր անունը, Ձեր խմբակցության անունը կարող է կապվել հանցագործ տարրերին կամ քրեական հեղինակություններին պաշտպանության տակ առնող մարդկանց հետ:

- Որևէ մեկը չի կարող ու թող չփորձի իմ անձը և մեզ կապել հանցավոր խմբերի հետ,մենք երբեք հանցագործությունը չենք խրախուսում, հանցագործը պետք է պատժվի օրենքի ողջ խստությամբ, բայց դա չի նշանակում, որ այն մարդը, որ հանցանք չի գործել, ուրեմն կարելի է իր նկատմամբ կիրառել նոր ընդունվելիք օրենքը: Ինչպե՞ս կարելի է մարդուն համարել հանցագործ, երբ մարդը ոչինչ չի արել: 

- Դուք արդարադատության նախարարից ստացա՞ք Ձեզ մտահոգող հարցերի պատասխանը:

- Ես իմ բարձրաձայնած մի շարք հարցերի պատասխանը չեմ ստացել, հուսով եմ, որ պարոն նախարարը եզրափակիչ ելույթի ժամանակ կտա իմ հարցերի, ինչպես  նաև իմ գործընկերների կողմից բարձրաձայնած հարցերի պատասխանը: Գիտեք, ես իրավաբան չեմ,  բայց արդարադատության նախարարից այս օրենքի առնչությամբ լսեցի ընդամենը գրագետ, իրավաբանորեն ձևակերպված նախադասությունների մի շարք ու վստահ եմ, որ մեր ժողովրդի 95 տոկոսին ընկալելի չեղավ, չհասկացվեց թե ինչի մասին է խոսքը:

Օրենքի նախագծի մեջ կան ձևակերպումներ, որոնք յուրաքանչյուր մարդ իր տրամաբանության, իր մտքի ճկունության հաշվին տարբեր ձևերով կարող է մեկնաբանել: Այսինքն՝ ստացվում է, որ մենք քննչական մարմին տալիս ենք մի հզոր գործիք, որով քննչական մարմինը պետք է որոշի՝ մարդը քրեական ենթամշակույթ կրող է, թե՝ չէ: Այս օրինագիծը ռիսկային է, քանի որ չկան հստակ ձևակերպումներ, դրանք ուղղակի անհասկանալի են: 

Ի վերջո, պետք է ազնիվ լինենք միմյանց նկատմամբ և չվախենանք իրերը կոչել իրենց անուններով. ովքե՞ր են քրեական ենթամշակույթ կրողները: Օրինակ, դաջվածքների մասով: Բանակում տարիներ առաջ սովորություն կար, որ զինվորները դաջվածք էին անում, դա մոդայիկ էր: Ազգային ժողովում մենք էլ ունենք պատգամավոր, որ դաջվածքով է: Հիմա նա համարվո՞ւմ է քրեական ենթամշակույթի կրող, թե՝ չէ: Կամ նույն թզբեհ պահելու կամ ունենալու երևույթը: Ինչպես են որոշելու այդ մասով ևս: Հայաստանում 2500 կալանավոր և դատապարտյալ ունենք, իրենց մոտ ինչպես է լինելու: 

Ես վստահաբար ասում եմ. այն սպառալիքները, որ կլինեն մեր պետության, պետականության, օրինականության հանդեպ, պետք է շատ արագ չեզոքացվեն օրենսդրական ողջ գործիքակազմով: Ցանկացած տիպի  հանցագործություն, բանդիտիզմ, հանցավոր խմբավորում, միանշանակ, այո, պետք է պատժվի օրենքի ողջ խստությամբ, բայց եթե մենք նոր կատեգորիա ենք ներմուծում, ուրեմն մենք պետք է բարի լինենք այդ նոր կատեգորիան հստակ ձևակերպել, որպեսզի հետո օրենքը փոխելու կարիք չլինի: Ոչ թե թույլ տանք, որ սերիալ կոչվածներով այդ ամենը տարածեն, քրեական հանցագործությունների ուղիղ քարոզ անեն, հետո ասեն, գիտեք ինչ, սա քրեական ենթամշակույթ է:  Մենք օրենքը այսօր ընդունում ենք, երբ իշխանությունը «Իմ քայլն» է, վաղը կարող է լինել ուրիշը, իսկ մյուս օրը՝մեկ այլ քաղաքական ուժ, բայց օրենքը մնալու է: Ուրեմն ընդունենք այնպիսի օրենք, որ ոչ մի քաղաքական ուժի օրոք տարընթերցումների տեղիք չտա:

Մելանյա Ծառուկյան

ՎԱՐԿԱՆԻՇ

   3605 ԴԻՏՈՒՄ

Տարածեք

ՆՄԱՆԱՏԻՊ ՆՅՈՒԹԵՐ
Դեպի ՎԵՐ