ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով ՀՀ վարչապետ Նիկոլ Փաշինյանի՝ այսօր արած այն հայտարարությանը, որ «սիստեմայի տակից հիվանդը դուրս է եղել և գնացել նշանդրեքի», և քաղաքացիները պետք է ինքնապաշտպանվեն, ասել է.
«Եթե քաղաքացին իշխանությանը ձայն է տվել, պետք է վերջինս նրա կյանքը կազմակերպի: Քաղաքացին ձայն չի տալիս, որ մի քանի իշխանավոր իրենց համար շքեղ թռիչքներ կազմակերպեն, շքեղ հյուրանոցներում հանգրվանեն. քաղաքացին նրա համար է ձայն տվել, որ իշխանությունն իր կյանքը բարելավի»:
«ՉԻ». Էլի սա մեջ ընկավ: Սրանց հիմարության դոզան ավելի ուժեղ է, քան՝ կորոնավիրուսինը: Այսինքն, Սերժ Սարգսյանն ու Ռոբերտ Քոչարյանը, որոնց անձնվիրաբար ծառայել է Գևորգ Պետրոսյանը, երևի արտերկիր մեկնելիս «կուկուրուզնիկով» էին թռնում, Փարիզում կամ Բադեն-Բադենում էլ հոսթելում մի հատ փոքր սենյակ էին վարձում, էնքան որ քնեին:
Բայց քանի որ շքեղության մասին է խոսել Գևորգ Պետրոսյանը, ասենք, որ այս նեղ մաջալին, երբ հայտնի դարձավ ևս 2 կորոնավիրուսով հիվանդի մասին, նույն այդ պահին իր առաջնորդը՝ Գագիկ Ծառուկյանը, իր թագավորական պալատում առյուծի ձագի հետ ֆոտոսեսիա է անում:
Ոչ մի խոսք կորոնավիրուսից, ոչ մի խոսք՝ որ պատրաստ է իր բազմաթիվ հյուրանոցներից գոնե մեկը հատկացնել կարանտինի տակ գտնվողներին: Մարդը կորյուն է կերակրում: