Միքայել Մինասյանը ֆեյսբուքի իր էջում գրել է. «Չերչիլն ասում էր՝ «Հիտլերի դեմ պայքարում պատրաստ եմ դաշնակցել նույնիսկ սատանայի հետ»։ Հիմա իմն է. Նիկոլի դեմ պայքարում բացարձակ կարևոր չէ, թե ով է կողքինդ։ Ով էլ լինի, ի տարբերություն Նիկոլի, հող չի հանձնել, ով էլ լինի՝ դավաճան չէ, ով էլ լինի՝ կապիտուլյանտ չէ, ով էլ լինի՝ օտարերկրյա գործակալների գործընկեր, պատանդ կամ մարիոնետ չէ։
Յուրաքանչյուրն ինքն է որոշում, թե բարիկադի որ կողմում է՝ դավաճանների, թե հայրենասերների»։
«ՉԻ». Չերչիլը մի լավ կպտտվեր գերեզմանում, եթե իմանար, թե իր խոսքերն ինչ կոնտեքստում են օգտագործում և ինչ կերպարների հետ են համեմատում:
Փաստորեն, ինքը Չերչիլն է, Փաշինյանը՝ Հիտլերը:
Ի գիտություն Միշիկի՝ հող հանձնող, դավաճան և կապիտուլյանտ են բոլոր նրանք, ովքեր 25 տարի խաբել են ժողովրդին: Համաշխարհային հանրությանը մի բան են խոստացել, բայց ժողովրդին ուրիշ բան ասել:
Վերը թվարկված էպիտետներին են արժանի բոլոր նրանք, ովքեր բանակը սպառազինելու փոխարեն «սպառազինել» են օֆշորի իրենց հաշվեհամարները:
Դավաճան էին բոլոր նրանք, ովքեր կեղծում էին ընտրությունները, այդ թվում 2017 թվականի, երբ ոչ միայն վերարտադրվում էին, այլ նաև նպաստում, որ իրենց քիմքին հաճելի ընդդիմություն տեսնեն խորհրդարանում: Խորհրդարանական գործընկերներ էլ այս նույն սկզբունքով ընտրեցիք, որ այսօր հայտնվեցինք այս վիճակում:
Հ.Գ. Իմիջիայլոց, ի տարբերություն ֆեյք Չերչիլի, իրական պատմական կերպարը, լինելով ամենաազդեցիկ ազնվական տոհմերից մեկի ներկայացուցիչը, դասալիք չի եղել և երիտասարդ տարիքում մեկնել է հարավային Աֆրիկա՝ մասնակցելու անգլո-բուրական պատերազմին: Մեր Չերչիլը, չգիտես ինչու, խուսափել է զինվորական ծառայություն անցնելուց: