Քաղաքագետ Լևոն Շիրինյանը՝ անդրադառնալով ապրիլի 24-ին ԱՄՆ-ի նախագահ Ջո Բայդենի հայտարարությանը, ասել է. «Բայդենն, ըստ էության, «իշմար» տվեց, որ Հայաստանում պետական հեղաշրջումով իշխանափոխություն չի լինելու»:
«ՉԻ». Այս մեկը կարող ենք հաստատել: Հենց այդպես էլ եղել է: Դուք երևի ուշադիր չեք եղել, երբ Բայդենը իր ուղերձը կարդում էր, արանքում մի անգամ գյոզերով աչքով տվեց: Ընդ որում՝ աջ աչքով, ինչը Հայաստանում պետական հեղաշրջումով իշխանափոխությունը բացառելու իշմար է:
Եթե ձախ աչքը թարթեր, դա կնշանակեր, որ Հայաստանում իշխանափոխություն է լինելու, բայց ընտրությունների միջոցով:
Այ, եթե երկու աչքն էլ ճպպցներ, այստեղ տխուր վիճակ կստացվեր, դա Հայաստանում պետական հեղաշրջումով իշխանափոխություն անելու իշմար կլիներ:
Դրա համար ենք ասում՝ որ Բայդենը խոսում է, միշտ ուշադիր հետևեք նրա աչքերի խաղին: Դրանից է կախված մեր իշխանությունների և ընդհանրապես՝ երկրի ապագան: