Իշխող «Քաղաքացիական պայմանագիր» կուսակցության Գյումրու տարածքային կազմակերպության ավագանու անդամներից Համլետ Մոսինյանը հայտարարություն է տարածել, որում նշվում է․
«ԳՅՈՒՄՐՈՒ ԸՆՏՐՈՒԹՅՈՒՆԻՑ ՀԵՏՈ, սթափ մտածելով, հանգում ես հետևյալ մտքին. արտառոց արդյունք չկա:
Հայրաքաղաքը քաղաքական տեսակետից երբեք միագույն չի եղել և պետք էլ չի, որ միագույն լինի:
Հիմա ինչ կարելի է անել /կամ հավանաբար ինչ կարվի/:
Քանի որ քաղաքին հանդարտ, հավասարակշռված կառավարում է անհրաժեշտ, պիտի կոալիցիոն ղեկավարություն կազմել:
Ամենամեծ 2 խմբավորումը միասին ստանձնում են քաղաքի և մարզի ղեկը 2 տարբերակից մեկով.
1-ին տարբերակ.
- հայրաքաղաքի համայնքապետը ընտրվում է «Բալասանյան դաշինք սոցիալական կուսակցությունից՛» /ԲԴՍԿ/, իսկ տեղակալները՝ «Քաղաքացիական պայմանագիր՛» կուսակցությունից /ՔՊԿ/
- Շիրակի մարզպետը նշանակվում է ՔՊԿ-ից, իսկ տեղակալները՝ ԲԴՍԿ-ից
2-րդ տարբերակ.
- քաղաքապետ ընտրվում է ՔՊԿ-ից, իսկ տեղակալները՝ ԲԴՍԿ-ից
- Շիրակի մարզպետ նշանակվում է ԲԴՍԿ-ից, իսկ տեղակալները՝ ՔՊԿ-ից:
Դրանից հետո հաշտ ու համերաշխ աշխատում են ինչպես անցած 3 տարիներին, իսկ վիճելի հարցերը լուծվում են ՀՀ տարածքային կառավարման նախարարությունում:
Սա են պահանջում Գյումրու և նրա բնակչության, ինչպես նաև մեր երկրի շահերը»:
«ՉԻ». 3 տարի առաջ ոչ մեկի մտքով չէր անցնի՝ Նիկոլ Փաշինյանն ու իր թիմը այնքան կընկնեն, որ պաշտոն կմուրան Սամվել Բալասանյանից: Մեկից, որն աշխատում էր հեզաճկուն քայլել նույն Փաշինյանի կողքով, երբ վերջինս այցելում էր Գյումրի:
Պատրաստ են հանուն Գյումրիի քաղաքապետի պաշտոնի նաև գործարքի գնալ և ՏԻՄ-ում հաղթած ուժին ներգրավել երկրի կառավարման գործում: Մարզի ղեկավարումը հենց դա է ենթադրում: Այսինքն՝ կուսակցությունը չի մասնակցել համապետական ընտրություններին, բայց կստանա մի ամբողջ մարզ ղեկավարելու իրավունք: Այսպիսի կոալիցիոն խճանկար անգամ հանրապետականների մտքում չէր ծնվում:
Բայց Բալասանյանն ավելի խելացի է, քան ենթադրում են ՔՊ-ականները: Ոչ մի կոալիցիա էլ չի կազմի իշխանության հետ: Նա դրա կարիքը չունի: Կկառավարի քաղաքը, «Զարթոնքն» ու մնացածն էլ չեն խանգարի:
Բալասանյանը վերջապես հասկացել է, որ ճակատից պետք է ջնջի բոլոր նախկին կուսակցությունների անվանումները և գրի՝ Բալասանյան: Դա անհամեմատ ավելի պատվաբեր է և անհամեմատ ավելի շահեկան: