Վատիկանում ՀՀ նախկին դեսպան Միքայել Մինասյանն իր տելեգրամյան ալիքում գրել է. «Երբ մարդիկ լուրջ տեսքով քննարկում են ներկայիս խորհրդարանի կազմաձևերը, նրանք մոռանում են, որ այս խորհրդարանը հեղափոխական բռնապետության խորհրդարան է:
Ընտրողներին թվում էր, որ առանց ընդդիմության խորհրդարանը իրենց կերջանկացնի, երկիրը հզոր, ապագան՝ պայծառ կդարձնի: Դե vox populi-vox Dei: Գագիկ Կոլյաևիչը հեղափոխական ընտրական էքստազի մեջ միացավ Նիկոլ Վովաևիչին: Էդմոն Հրաչիկովիչին հաղթողների սեղանից թերմացքներ հասան: Դե, հեղափոխական երջանկությունը եկել է: Ինչպե՞ս կարող է լինել առանց դրա:
Այդ պատճառով Հայաստանում չկա խորհրդարանական ընդդիմություն: Ներկայիս խորհրդարանի խմբակցությունները գոյություն ունեն միայն և միայն նիկոլական շահերը սպասարկելու համար: Դատեք ինքներդ՝ ընդդիմադիրներին այլևս չեն ծեծում խորհրդարանում, խորհրդարանական հանձնաժողովների նախագահներին չեն քշում իրենց պաշտոններից, իշխանությունների հասցեին քննադատությունը դարձել է ստրկամիտ, և խորհրդարանական ընդդիմությունը սկսել է մասնակցել նիկոլական իշխանության վերբեռնմանը»:
Մտնում ես խորհրդարան, վարչապետն ու նրան ծափ տվողները այնպիսի բաներ են խոսում, թող ու փախի: Մտնում ես ֆեյսբուք, կարդում ես Միքայել Մինասյանի գրածները...
Գիտե՞ք, թե ինչու է Միքայել Մինասյանն այսպես վրա տվել Գագիկ Ծառուկյանին, Էդմոն Մարուքյանին, Նիկոլին: Հլը մի հատ լավ մտածեք. օրինաչափություն չե՞ք նկատում: Միքայել Մինասյանը հատ-հատ հիշատակում է այն ուժերին, որոնց Սերժ Սարգսյանը ժամանակին խորհրդարանական ընդդիմություն էր նշանակել:
Ովքե՞ր են այսօր ներկայացնում խորհրդարանը. «ՔՊ»-ն, «Լուսավոր Հայաստանն» ու «Բարգավաճ Հայաստանը»: Այսինքն՝ այն ուժերը, որոնք ներկայացնում էին նախորդ խորհրդարանը՝ ՀՀԿ-ի հետ միասին: Ու Միքայել Մինասյանի գրածի մեջ նեղսրտություն կա, որ ախր սա մեր աճեցրած ընդդիմությունն է: Մի հատ եկեք Մ. Մինասյանի գրածի վերջին պարբերությունը նորից ներկայացնենք, միայն Նիկոլի տեղը Սերժ գրենք, ու տեսեք, ինչ է ստացվում:
«Այդ պատճառով Հայաստանում չկա խորհրդարանական ընդդիմություն: Ներկայիս խորհրդարանի խմբակցությունները գոյություն ունեն միայն և միայն սերժական շահերը սպասարկելու համար: Դատեք ինքներդ՝ ընդդիմադիրներին այլևս չեն ծեծում խորհրդարանում, խորհրդարանական հանձնաժողովների նախագահներին չեն քշում իրենց պաշտոններից, իշխանությունների հասցեին քննադատությունը դարձել է ստրկամիտ, և խորհրդարանական ընդդիմությունը սկսել է մասնակցել սերժական իշխանության վերբեռնմանը»:
Դե թող Միքայել Մինասյանն ասի, որ այդպես չի եղել: Այնպես որ, իզուր է նեղսրտում. ձեր սարքած, փչած ընդդիմությունն է, այն դերակատարումը, որը խորհրդարանում ձեր օրոք տրված էր նրանց, նույն դերակատարումն էլ հիմա է տրված: Տարբերությունը երկու անունների մեջ է: Չեք թողել, որ նորմալ ընտրություններ լինեն և խորհրդարանում նորմալ քաղաքական ուժեր հայտնվեն, հիմա ումի՞ց եք բողոքում: Արդար է, ապեր, արդար:
Հ.Գ. Բայց մի փաստական ուղղում մտցնենք. այս խորհրդարանում Նաիրա Զոհրաբյանին քշել են իր՝ հանձնաժողովի նախագահի պաշտոնից: