Հայտնի շրջանակներին սպասարկող մամուլը գրում է, թե իշխանությունները նպատակ ունեն առաջիկայում օրենքի նախագիծ ներկայացնել, որով կարգելեն Ազգային անվտանգության ծառայության նախկին տնօրեններին զբաղվել քաղաքականությամբ: Այս թեմայի շուրջ Armlur-ը զրուցել է Արթուր Վանեցյանի հետ:
«Ես կարծում եմ, որ դա նպատակային է իրականացվում: Նպատակային նման օրենք են ուզում ներկայացնել, որը միտված է կոնկրետ ինձ սահմանափակելուն, որպեսզի քաղաքականությամբ զբաղվեմ, բայց օրենքը չի կարող հետադարձ ուժ ունենալ ու նման օրենք նախաձեռնելը սխալ է: ԱԱԾ աշխատակիցը քաղաքացի է, որը օգտվում է մարդու բոլոր իրավունքներից: Իսկ մարդուն սահմանափակել այս կամ այն գործունեությամբ զբաղվելու, դա մարդու իրավունքների ոտնահարում է, որը անթույլատրելի եմ համարում»:
«ՉԻ». Շատ հետաքրքիր մարտավարություն է: Սկզբում իշխանությունների մի անհեթեթ որոշման մասին բամբասանք ես տիրաժավորում, իսկ հետո սկսում ես դրա դեմ պայքարել: Եվ ամենակարևորը` քանի որ ոչ ոք նպատակ չի ունեցել նման որոշում կամ օրենք կիրառել, կարող ես ներկայացնել, թե իբր քո պայքարի արդյունքում դա կասեցվեց:
Փաստորեն, Վանեցյանն էլ գիտի, որ օրենքը հետադարձ ուժ չունի և անգամ եվրոպական դատարան հասնելու անհրաժեշտություն չէր առաջանա և հայաստանյան ցանկացած դատարան կվերացներ այդ օրենքի կիրառումը:
Ինչ վերաբերում է կոնկրետ Վանեցյանին: Կարծում ենք՝ իրականությունը ճիշտ հակառակն է: Իշխանությունը շահագրգռված է, որ Վանեցյանը զբաղվի քաղաքականությամբ: Նրա պես ընդդիմախոս ունենալը նվեր է ցանկացած իշխանության համար:
1.5 տարի է՝ ընդդիմություն է, իսկ գործունեության միակ գնահատականն է՝ ինչպե՞ս կարելի էր նման մարդուն վստահել ազգային անվտանգությունը: Համաձայնեք, որ նման ընդդիմադիրին պետք է աչքի լույսի պես պահել: