ԱԺ «Հայաստան» խմբակցության պատգամավոր Արամ Վարդևանյանն այսօր ընդդիմության ակցիայի ժամանակ՝ բարձրախոսով դիմելով ցուցարարներին, հայտարարել է. «Ժողովուրդ ջան, մի հատ հայտարարություն ունեմ: Ուրեմն՝ նոր Իշխան Սաղաթելյանը հայտարարեց, որ մենք անհնազանդության ակցիաները կարանք դադարեցնենք: Հալալ է մեր բոլոր խմբերին»:
«ՉԻ». Զարմանալի է: Շատ տարօրինակ է: Դրսում քարվան կտրելու... էէ, կներեք, հայրենիք փրկելու հրաշալի եղանակ է, արև, տաք, փոխանակ իշխանությունը վերցնեն, ճիշտ հակառակն են անում:
Որպես կանոն՝ խավարասերներն են լույսից փախչում, դուք ինչի՞ եք փախչում: Չէ լավ, փախչել բառը տեղին չէ: Իշխան Սաղաթելյանը հայտարարել է, որ անհնազանդության ակցիաները դադարեցնում են, քանի որ իրենց առջև դրված խնդիրը լիարժեք կատարել են:
Եթե լիարժեք կատարել են, նշանակում է՝ այլևս Հայաստանում իշխանափոխություն է եղել: Նիկոլը փախել է Հայաստանից, կամ վայր է դրել լիազորությունները: Ոնց որ թե սա էր ընդդիմության գլխավոր խնդիրը:
Կամ էլ, հլը ճիշտն ասեք, տպավորություն է, որ ձեր գլխավոր խնդիրը Արթուր Վանեցյանին պատգամավորական մանդատից զրկելն էր: Դե հա, երեկ Վանեցյանը հայտարարեց, որ եթե շարժումը չհաջողի, ապա ինքը Ազգային ժողովում անելիք չունի: Հիմա եթե շարժումը չի հաջողել, ինչպես Իշխան Սաղաթելյանը ավետեց, ստացվում է, որ խորհրդարանը զրկվելու է Վանեցյանից: