Թուրքական խոհանոցում բադրիջաններից պատրաստված ուտեստները բազմաթիվ են, այստեղ բադրիջանն իրավամբ բանջարեղենների արքան է ու հրաշալի համադրվում է այլ բաղադրիչների՝ մասնավորապես պանրի ու նռան հետ:
Բաղադրիչները
- 4 միջին չափի բադրիջան
- 2 կարմիր քաղցր տաքդեղ
- 1 փոքր գլուխ սոխ
- փոքր փունջ անանուխ
- 1 պճեղ սխտոր
- 200 գ բրինզա պանիր
- 2 ճ.գ. նռան հյութ
- 1 կիտրոնի հյութ
- 1/2 թ.գ. աղացած դարչին
- 1 թ.գ. զիրայի սերմեր
- ձիթապտղի ձեթ
- աղ
- աղացած սև պղպեղ
Պատրաստման եղանակը
- Տաքդեղները բոլոր կողմերից խորովեք, անմիջապես տեղադրեք պոլիէթիլենային փաթեթների մեջ ու թողեք մոտ 10 րոպե: Հետո հովացրեք, մաքրեք կեղևից ու սերմերից, կտրատեք ոչ շատ բարակ շերտերով:
- Բադրիջանները 2-3 սմ հաստությամբ շրջանաձև կտրատեք, վրան աղ ու աղացած դարչին ցանեք: Խորովեք, մինչև ոսկեգույն երանգ ստանալը:
- Բրինզա պանիրը քառակուսիաձև կտրատեք, իսկ սոխը՝ կիսաօղակների ձևով: Սոխի վրա կիտրոնի հյութ ցանեք: Անանուխի ցողունները հեռացրեք, տերևները կտրատեք:
- Սխտորը ճզմեք, մաքրեք ու կտրատեք: Փոքր պնակի մեջ լցրեք սխտորը, զիրան, աղն ու պղպեղը, ճզմեք: Պնակի մեջ ավելացրեք նռան հյութն ու 4 ճ.գ. ձիթապտղի ձեթը:
- Ափսեի մեջ տեղադրեք խորոված բադրիջաններն ու տաքդեղները, ավելացրեք բրինզա պանիրը, սոխը: Լցրեք նռան սոուսը ու աղցանը զարդարեք կտրտած անանուխով:
Խորհուրդ: Եթե սիրում եք նուռ, կարող եք ավելի շատ նռան հյութ օգտագործել, իսկ աղցանը զարդարել նռան հատիկներով: Աղցանի մեջ տաքդեղները կարող եք փոխարինել լոլիկով, այդպես աղցանն ավելի թեթև կստացվի: