...

Հեշտ ու համեղ. Լցոնած սկումբրիա

Հեշտ ու համեղ. Լցոնած սկումբրիա

Չնայած նրան, որ ծովափին ապրող թուրքերը ձուկ շատ են սիրում և այն պատրաստելու տարբեր եղանակներ գիտեն, երկրի՝ ծովից հեռու գտնվող քաղաքներում ձկանը բավական անտարբեր են վերաբերվում: Թուրքական խոհանոցում ամենատարածված ձկնատեսակներից է սկումբրիան, որը ոչ միայն տապակում են, այլև լցոնում չամիչով, պիստակով, բրնձով ու անունը «տոլմա» դնում:

Բաղադրիչները
4 բաժնի համար

  • 4 ամբողջական սկումբրիա՝ յուրաքանչյուրը 200-300 գ քաշով
  • 2 միջին չափի գլուխ սոխ
  • 2 ճ. գ. չամիչ
  • 2 ճ. գ. մայրու ընկույզ
  • 2 ճյուղ մաղադանոս
  • 2 ճյուղ համեմ
  • 1 ճ. գ. մանրացրած չորահաց
  • 6 ճ. գ. ձիթապտղի ձեթ
  • 1 թ. գ. աղացած դարչին
  • աղ, աղացած սև պղպեղ

Պատրաստման եղանակը

  1. Ձկների լողակները, ներքին օրգաններն ու խռիկները հեռացրեք, թեփուկները դանակով քերեք ու ձկները լավ լվացեք հոսող ջրի տակ: Ձկների գլխից մինչև պոչը փորի մասից կտրվածք արեք, հնարավորինս մաքրեք փշերից ու ոսկորներից:
  2. Ձկան ներսի մասից մի քիչ փափուկ միս առանձնացրեք, այն պետք է գալու լցոնելու համար: Առանձնացրած միսը դանակով կտրատեք: Մանր կտրատեք նաև համեմն ու մաղադանոսը:
  3. Մաքրեք ու մանր կտրատեք սոխը: Թավայի մեջ 3 ճ. գ. ձեթ տաքացրեք, ավելացրեք կտրտած սոխն ու միջին ուժգնության կրակի վրա մոտ 5 րոպե տապակեք:
  4. Ավելացրեք մայրու ընկույզը, չամիչն ու աղացած դարչինը, աղ ու պղպեղ արեք, խառնեք ու ևս 2-3 րոպե պահեք կրակի վրա:
  5. Թավան վերցրեք կրակի վրայից, վրան ավելացրեք ձկան կտրտած միսը, կանաչին ու մանրացրած չորահացը:
  6. Ձկները լցոնեք ստացված զանգվածով, ծայրերը միացրեք ատամի չոփիկներով:
  7. Ձկներից յուրաքանչյուրը պատեք ձեթով ու փաթաթեք փայլաթիթեղի մեջ: 15 րոպեով տեղադրեք 200 աստիճան ցելսիուս տաքության ջեռոցում:

Խորհուրդ: Մի վախեցեք ձկան ու դարչինի համադրությունից. այն իսկապես շատ համեղ է: Պարզապես չորահացը կարող եք փոխարինել եփած բրնձով, իսկ համեմը՝ անանուխով:

«Չորրորդ իշխանություն», թիվ 2, 2021

ՆՄԱՆԱՏԻՊ ՆՅՈՒԹԵՐ
Դեպի ՎԵՐ