Հրեական խոհանոցում բազմաթիվ սահմանափակումներ կան՝ կապված այս կամ այն մթերքի կամ մթերքների համադրությունների հետ: Այդպիսի սահմանափակումներ են գործում որոշ ծովամթերքների և ձկնատեսակների համար, որոնք թեփուկներ ու լողակներ չունեն: Բարեբախտաբար կարպը (կամ ծածանը) այդ սահմանափակումների մեջ չի մտնում:
Բաղադրիչները
6 բաժնի համար
- 1 կգ կարպի ֆիլե
- 150 գ կարագ
- 3 միջին չափի գլուխ սոխ
- 3 պճեղ սխտոր
- 3-4-ական ճյուղ մաղադանոս ու համեմ
- 3 ձու
- 1/2 բաժակ հացի փշուր
- ալյուր
- աղ, աղացած սև պղպեղ
Պատրաստման եղանակը
- Մաքրեք ու մանր կտրատեք սոխը: Թավայի մեջ 50 գ կարագ հալեցրեք, լցրեք սոխը, խառնելով մոտ 5 րոպե տապակեք միջին ուժգնության կրակի վրա մինչև փափկելը: Հանեք կրակի վրայից ու հովացրեք:
- 2 ծանր դանակի օգնությամբ մանրացրեք ձկան միսը կամ մսաղացով աղացեք:
- Դանակի կոթով ճզմեք, մաքրեք ու մանր կտրտեք սխտորը: Շատ մանր կտրատեք կանաչին, ևս մեկ անգամ էլ կտրտեք սխտորի հետ միասին:
- Ձկան խճողակը խառնեք սոխի, կանաչու, սխտորի, հացի փշուրների հետ, ավելացրեք ձուն, աղ ու պղպեղ արեք: Ձեռքերով 5-10 րոպե լավ հունցեք խճողակը, ծածկեք ու 1,5 ժամով տեղադրեք սառնարանում:
- Ալյուրը խառնեք աղի հետ:
- Թաց ձեռքերով խճողակից ոչ մեծ կոտլետներ արեք, թաթախեք ալյուրի մեջ և հալած կարագի մեջ միջին ուժգնության կրակի վրա հաճախ շրջելով տապակեք մինչև ոսկեգույն երանգ ստանալը:
- Մատուցեք տաք վիճակում:
Խորհուրդ: Կարպի ֆիլե հազվադեպ է վաճառվում, բացի այդ, նրանում միևնույն է փուշ շատ կա: Չնայած՝ կարպի փշերը վնասակար չեն, աղացած վիճակում դրանք չեն խանգարի, հակառակը՝ ավելի շատ ֆոսֆոր կստանաք: Եթե ֆիլեի փոխարեն ամբողջական ձուկն եք գնում, անհրաժեշտ քանակի փափուկ միս ստանալու համար ձուկը պիտի 1,7 կգ կշռի:
«Չորրորդ իշխանություն», թիվ 12, 2021