Լոբին մալթյան ռեստորանների ավանդական նախուտեստն է: Այն պատրաստում են կծու կամ ոչ կծու, երբեմն համեմում են զիրայով, երբեմն էլ բավարարվում են դասական ձեթ-աղ-պղպեղ համադրությամբ: Լոբուց երբեմն թանձր սոուսներ են պատրաստում և մատուցում տապակած հացի հետ: Մի խոսքով՝ լոբին անպայման պետք է առկա լինի յուրաքանչյուր սեղանին:
Ուտեստն սկսեք պատրաստել մատուցելուց 14-18 ժամ առաջ:
Բաղադրիչները
4 բաժնի համար
- 400 գ սպիտակ լոբի
- 1 պճեղ սխտոր
- 1 չորացրած չիլի պղպեղ
- 3-4 ճյուղ մաղադանոս
- 2 ճ. գ. գինու քացախ
- 4 ճ. գ. ձիթապտղի ձեթ
- աղ, աղացած սև պղպեղ
Պատրաստման եղանակը
- Լոբին 12 ժամով թրջեք մեծ քանակության սառը ջրի մեջ:
- Լոբին լվացեք, վրան թարմ սառը ջուր լցրեք, հասցրեք եռման աստիճանի ու եփեք մինչև փափկելը՝ մոտ 1 ժամ: Աղ մի արեք:
- Լոբին քամեք, լցրեք թասի մեջ, 2 ճ. գ. ձիթապտղի ձեթ լցրեք վրան, աղ ու պղպեղ արեք, խառնեք:
- Պատրաստեք համեմունքը: Մանր կտրատեք մաղադանոսը: Ճզմեք, մաքրեք ու կտրտեք սխտորը: Մանր փշրեք չորացրած չիլի պղպեղը:
- Մնացած 2 ճ. գ. ձիթապտղի ձեթը խառնեք քացախի, մաղադանոսի, սխտորի, չիլի պղպեղի և աղի հետ: Ստացված խառնուրդը լցրեք տաք լոբու վրա և խառնեք:
- Կարող եք միանգամից տաք վիճակում մատուցել, կարող եք նաև 2-4 ժամ թողնել հովանա և նոր միայն մատուցել:
Խորհուրդ: Լոբին կարող եք մատուցել ոչ միայն որպես նախուտեստ, այլև որպես խավարտ՝ մսով ուտեստների հետ:
«Չորրորդ իշխանություն», թիվ 3, 2021