Քաղցր ու համեղ. Նուշից կաթով աղանդեր

Արևելյան ժողովուրդները քաղցրակեր են և հաճույքով նշում են քաղցրի տոնը, որի ժամանակ հյուրասիրում են ավանդական քաղցրեղենով՝ շերբեթով, փախլավայով, թխվածքաբլիթներով, շաքարած ընկուզեղենով և նուրբ, նուշի համով աղանդերով, որի բաղադրատոմսը ներկայացնում ենք ստորև:

Աղանդերն սկսեք պատրաստել մատուցելուց 3 ժամ առաջ:

Բաղադրիչները
6-8 բաժնի համար

• 800 մլ կաթ
• 120 գ մաքրած, չբոված նուշ
• 4-5 ճ. գ. շաքարավազ
• 30 գ բրնձի կամ եգիպտացորենի օսլա
• պիստակ և նուշ՝ զարդարելու համար

Պատրաստման եղանակը

1. Սրճաղացի կամ բլենդերի օգնությամբ ալյուրի վերածեք նուշը, լցրեք պնակի մեջ:
2. Կաթի կեսը մոտ 70 աստիճան ցելսիուս տաքացրեք և ավելացրեք փոշիացրած նուշը: 30 րոպե թողեք մնա:
3. Մառլայի օգնությամբ քամեք կաթը:
4. Կաթի մյուս կեսի մեջ ավելացրեք շաքարավազն ու տաքացրեք միջին ուժգնության կրակի վրա՝ չհասցնելով եռման աստիճանի: Հանեք կրակի վրայից:
5. Օսլան բացեք փոքր քանակի սառը ջրի մեջ, ապա ավելացրեք կաթով կաթսայի մեջ՝ անընդհատ խառնելով, որպեսզի գնդիկներ չառաջանան:
6. Կաթսան կրկին դրեք կրակին, ավելացրեք նուշով կաթը ու տաքացրեք՝ անընդհատ խառնելով մինչև կաթը խտանա:
7. Կաթը լցրեք աղանդերի համար նախատեսված պնակների մեջ, թողեք հովանա, ապա դրեք սառնարանի մեջ մինչև սառչի՝ մոտ 2 ժամ:
8. Մատուցելուց առաջ զարդարեք կտրտած նուշով ու պիստակով:

Խորհուրդ: Այս աղանդերը՝ ի տարբերություն փախլավայի, հեշտ է պատրաստվում, և այն հաճախ է հանդիպում առօրյա կերակրացանկում: Աղանդերը նուշի ու պիստակի փոխարեն կարող եք զարդարել չրերով և նրա հետ հարած սերուցք մատուցել:

«Չորրորդ իշխանություն», թիվ 5, 2021