Առաջարկում ենք պատրաստել խոզի մսով լցոնած կարտոֆիլային համեղ յուղաբլիթները:
Բաղադրիչները
6 բաժնի համար
- 12 հատ կարտոֆիլ
- 1 հատ ձու
- 2 ճ.գ. ալյուր
- 100 գ կարագ կամ յուղ
Խճողակի համար
- 400 գ խոզի փափկամիս
- 2 գլուխ սոխ
- 1 ճ.գ. բուսական յուղ
- աղացած սև պղպեղ
- աղ
Պատրաստման եղանակը
- Կարտոֆիլը մանր քերիչով քերեք, ավելացրեք ալյուրը, ձուն, աղ արեք ու խառնեք:
- Խճողակի համար աղացեք խոզի միսը: Սոխը մանր կտրատեք, տապակեք բուսական յուղի մեջ, հովացրեք:
- Ավելացրեք աղացած խոզի միսը, աղ ու պղպեղ արեք, խառնեք:
- Թավայի մեջ լցրեք յուղը կամ կարագը, լավ տաքացրեք: Գդալով, փոքր չափաբաժիններով կարտոֆիլի զանգվածից յուղաբլիթների ձևով գնդիկներ տեղադրեք թավայի մեջ, հարթեցրեք, վրան լցրեք մսի խճողակը, նորից հարթեցրեք, ապա կրկին կարտոֆիլի մի շերտ քսեք, հարթեցրեք:
- Յուղաբլիթները երկու կողմից տապակեք մինչև ոսկեգույն երանգ ստանալը: Յուղաբլիթները տեղադրեք կարագ քսած տապակի մեջ և 15 րոպեով տեղադրեք ջեռոցի մեջ:
Պատրաստի յուղաբլիթները մատուցեք թարմ կամ թթու դրած բանջարեղենի հետ: