«- Պարոն Դավթյան, Դուք է՞լ եք համաձայն, որ պետք չէ արտահերթ ընտրություններ անցկացնել:
- Ես իմ մասին չեմ ուզում ինֆորմացիա տալ:
- Ես «Իմ քայլի» հայտարարության մասին եմ հարցնում՝ կո՞ղմ եք, թե՞ դեմ:
- Ես անձամբ իմ քվեարկության մասին չեմ ուզում ասել:
- Ձեր կարծիքը հիմնավորեք՝ ինչո՞ւ եք նման հայտարարություն տարածել:
- Կարծիքը հայտնել է խմբակցությունը:
- Համաձա՞յն եք, որ արտահերթ ընտրությունների հանրային պահանջ չկա:
- Դա արդեն իմ կարծիքն եք հարցնում, ես էլ չեմ ուզում կարծիք հայտնել»:
Չէ, սա հումոր չէ, հարցազրույց է ԱԺ պատգամավոր, «Իմ Քայլը» խմբակցության պատգամավոր Արթուր Դավթյանի հետ: Հատուկ նշենք, որ Դավթյանը մասնագիտությամբ իրավաբան է:
«ՉԻ». Անգամ Շմայսը, Սեյրան Սարոյանը կամ մեկ այլ կարկառուն հանրապետական նման կարգի անհեթեթություններ դուրս չէին տա: Նրանց ոչ հայեցի խոսքն ավելի շատ քաղաքական տարրեր կպարունակեր, քան հեղափոխության արդյունքում պատգամավոր դարձած Դավթյանինը: Չեք հավատում, վերընթերցեք վերևում նշված անձանց հարցազրույցները:
Պատգամավորը չի ընկալում, որ իրեն հարց չեն տալիս իր անձնական նախասիրությունների մասին: Չեն հարցնում՝ շիկահեր կանանց եք սիրո՞ւմ, թե՞ սևահեր: Չեն հարցնում խոզի խորոված եք նախընտրո՞ւմ, թե՞ գառան:
Դժվար չէ արտահայտվել, թե ինչ կարծիք ունի արտահերթ ընտրությունների օրակարգի վերաբերյալ: Կարող էր, չէ՞, ասել՝ կողմ եմ կամ դեմ, բայց ենթարկվում եմ խմբակցության որոշմանը: Բայց ոչ, չեմ ասի ու վերջ: Կարծես պետական կամ անձնական գաղտնիք են հարցնում:
Հետո էլ նեղանում են, երբ համեմատում են ուսապարկի հետ: