Պրոդյուսեր Արմեն Գրիգորյանը մամուլի ասուլիսի ժամանակ ասել է. «Երկու օր առաջ Ռոբերտ Քոչարյանի շուրթերով Ռուսաստանը հայտարարեց, որ լինելու են ընտրություններ: Ընտրություն լինելու է, որովհետև ռուսներն այդպես են որոշել՝ քանի որ մենք Ռուսաստանի կցորդ ենք: Ըստ օդում կախված լուրերի՝ դա լինելու է մայիսին»:
«ՉԻ». Փաստորեն, Ռոբերտ Քոչարյանը Ռուսաստանի շուրթերն է: Քանի կար, ասում էին՝ կցորդն է, ֆորպոստը, բայց չէ, պարզվում է՝ ընդամենը շուրթերն է: Որ Քոչարյանը խոսում է, մի մտածեք, թե իրականում ինքն է խոսում:
Մոսկվայում ինչ-որ մեկը ձեռքին պուլտ ունի, դրանով կառավարում է Քոչարյանի շուրթերը: Ու այդ շուրթերը պուլտի շնորհիվ իրենք իրենց բացվում են, փակվում, պուլտի տերը զվուկ է միացնում, ու Քոչարյանի շուրթերից ձայներ են դուրս գալիս, բառեր, նախադասություններ: Ու տենց Ռուսաստանն ինչ ուզում է, դա էլ Քոչարյանի շուրթերով ասում է: Շատ հզոր տեխնոլոգիա է:
Այս օդում կախված կոմիկին ասեք, որ Ռուսաստանի կցորդ լինելու մասին հպարտությամբ չեն նշում: Եթե որոշել է, որ ինքը Ռուսաստանի կցորդն է, թող գնա կցվի, բայց Հայաստանը հանգիստ թողնի: Չնայած, սա մեր մեջ, ենթադրում ենք, որ սա ինչ-որ պահից Քոչարյանի կցորդն է դառնալու: Չի էլ հասկանում, որ Քոչարյանին Ռուսաստանի շուրթեր անվանելով, իրականում նվաստացնում է նրան: Խոսք տանող-բերող է համարում: