Ալեն Սիմոնյանի ընտանիքին պատկանող Freenews.am կայքը գրում է. «ՀՀ անկախության օրվան նվիրված միջոցառմանը Հանրապետության հրապարակում ներկա էին գրեթե բոլոր բարձրաստիճան պետական այրերը, բացառությամբ նրանց, ովքեր բացակայում էին հարգելի պատճառով: Ուշագրավ էր սակայն Երևանի քաղաքապետ Հայկ Մարությանի հայտարարությունը առ այն, որ ՀՀ անկախության օրը կլինի Արցախում: Սա առնվազն անարգանք է պետական ինստիտուտների նկատմամբ: Երևանի քաղաքապետ դարձած դերասան Հայկոն առաջին անգամ չէ, որ անդավաճան մնալով իր մասնագիտությանը՝ սուտ հայրենասիրություն է խաղում: Հայրենասեր խաղացող դերասան Հայկոն ավելի ճիշտ կաներ տոներ Չեխիայի անկախության տոնը, քանզի Հայկոյի հայրենիքը վաղուց Չեխիան է, որտեղ անշարժ գույք է ձեռք բերում ու ներդրումներ անում»:
«ՉԻ». Ամբողջը հասկացանք. Հայկ Մարությանը կրկին դերասան է, իսկ Ալեն Սիմոնյանը պետական այր, հեղափոխության հիմնադիր հայրերից մեկը:
Բայց կա մի հանգամանք, որը հակասում է առողջ բանականությանը և քաղաքագիտությանը:
Ընդունենք, որ Հայկ Մարությանը «դավաճանել է» իրեն քաղաքապետ դարձրած ուժին, վերջին ընտրությունների ժամանակ իրեն պասիվ է պահել՝ մտածելով, որ կարող է չհաղթեն:
Բայց բացի քաղաքապետից կա նաև ավագանի, որտեղ մեծամասնություն է կազմում «Իմ Քայլը» դաշինքը: Հիմա պարզաբանեք՝ իրենք է՞լ են դերասան, սուտի հայրենասեր և ի վերջո դավաճան: Եթե այո, ասեք՝ մենք էլ իմանանք: Եթե համարձակություն ունեն, թող անվստահություն հայտնեն քաղաքապետին, թե չէ Ալեն Սիմոնյանը սահմանափակվում է իրեն ենթակա կայքերի էջերում այսօրինակ անորակ պասկվիլներ տեղադրելով:
Այսպես ձեզ ավելի խղճալի վիճակում եք դնում: Բայց դուք էս ի՜նչ մեղք եք: